Ti siêu thị Co.opMart Pleiku, čar Gia Lai, ai êwa blei mprăp mnơ̆ng dưi mkŏ mjing mčhĭt mơuăt. Dŭm mta mnơ̆ng dưi dăp tring, doh bhung hŏng djăp mta mnơ̆ng mơ̆ng mnơ̆ng ƀơ̆ng huă, mnơ̆ng yua truh kơ dŭm mta mnơ̆ng mkăn. Grăp mta mnơ̆ng dưi ksiêm dlăng kjăp êlâo kơ ba dăp, rơ̆ng klă nik phŭn gha anôk mkra mjing. Aduôn Châu Hoàng Thy, kơiăng khua siêu thị Co.opMart Pleiku, brei thâo:

 “Ti siêu thị mâo lu mta êdi mnơ̆ng mnuă, jih mnơ̆ng anăn mâo anôk mkra mjing mâo kơhưm mâo klei bi mklă ISO 9000, dŭm mta mnơ̆ng anei mâo hnơ̆ng tŭ jăk. Hmei mđing êdi kơ mnuih blei yua, kơ hdră kriê dlăng mnơ̆ng dhơ̆ng truh kơ bruă rang mdah, dăp mnơ̆ng kñăm rơ̆ng hnơ̆ng tŭ jăk, amâo lui mnơ̆ng dhơ̆ng amâo jăk mŭt hlăm anôk mnia mblei, kuôl kă hŏng phung mkăp brei mâo hră bi mklă mâo anôk bruă knŭk kna mkăp”.

Amâo djŏ knŏng ti siêu thị prŏng, bruă rơ̆ng phŭn agha anôk mkra mnơ̆ng dhơ̆ng ăt mâo phung ghan mnia alŭ wăl mđing dlăng. Amai Trần Kim Huế, khua anôk čhĭ mnơ̆ng Sơn Huế ti wăl krah Čư̆ Ty, kdriêk Đức Cơ, bi êdah klei čiăng kơ êpul djŏ tuôm ksiêm dlăng kjăp hĭn hdră čhĭ mnơ̆ng online lehanăn bruă čhĭ mnơ̆ng mơ̆ng krĭng knông lăn čiăng răng mgang phung chĭ mnia djŏ hdră bhiăn.

 “Kâo čhĭ dŭm mta mnơ̆ng mâo anôk bruă jao, mâo hră mơar bi mklă klei doh êƀăt mnơ̆ng dhơ̆ng, mâo hră bi mklă klei doh êƀăt mnơ̆ng dhơ̆ng leh kâo mrâo mphŭn čô̆ kơ bruă. Mnơ̆ng amâo thâ oklă phŭn agha mkra mjing kâo amâo ba čhĭ ôh kyua ară anei mnuih ƀuôn sang blei mnơ̆ng thâo mơh, tơdah blei mnơ̆ng amâo thâ oklă anôk bruă, amâo hruh đŭng diñu kăn blei mơh”.

Hlăm wưng pŏk hdră ksiêm dlăng mơ̆ng hruê 15/5 truh kơ hruê 15/6, êpul djŏ tuôm čar Gia Lai hmao ƀuh hlăm brô 90 klei ngă soh, msir mghaih đŭ bi kmhal hŏng ênoh prăk truh 1,7 êklai prăk. Năng mđing, kahan ksiêm čar hmao ƀuh lehanăn kčŭt hưn 2 boh klei mnia mblei, čhĭ kphê mgưt. Sa klei djŏ tuôm kơ hbâo pruê lehanăn mnơ̆ng yua lŏ hma ăt dôk ksiêm dlăng čiăng bi mklă. Lê Hồng Hà, Khua knơ̆ng kriê dlăng wăl anôk mnia mblei čar Gia Lai, brei thâo:

 “Hlăm klei gĭt gai mơ̆ng Khua knŭk kna kơ bruă pŏk hdră ksiêm dlăng boh klei anei, mđing kơ dŭm mta djŏ tuôm kơ mnơ̆ng dhơ̆ng mnuih ƀuôn sang yua, mnơ̆ng ƀơ̆ng mgưt amâo doh êƀăt, êa drao mgưt dôk mâo hlăm wăl anôk mnia mblei. Anôk gĭt gai lehanăn êpul mă bruă mơ̆ng čar Gia Lai mđing kơ dŭm hdră anei. Mbĭt anăn čar ăt gĭt gai, mđing kơ dŭm bruă mkăn msĕ si êa săng êa pui, hbâo pruê, mnơ̆ng yua hlăm bruă lŏ hma kñăm gang mkhư̆ lehanăn kriê dlăng klei tŭ dưi djŏ hdră bhiăn kơ mnuih ƀuôn sang lehanăn anôk bruă duh mkra mnia mblei ti alŭ wăl.

Amâo djŏ knŏng hlăm bruă mnia mblei, anôk bruă mdrao mgŭn čar Gia Lai ăt mđing êdi kơ bruă ksiêm dlăng, msir mghaih klei ngă soh. Knơ̆ng bruă mdrao mgŭn čar mkŏ mjing leh 2 êpul ksiêm dlăng kơ hdră mnia mlei êa drao gŭn, mnơ̆ng bi msiam bô̆ mta lehanăn klei doh êƀăt mnơ̆ng dhơ̆ng. Mơ̆ng hdră ksiêm dlăng ti dŭm alŭ wăl msĕ si ƀuôn prŏng Pleiku, kdriêk Đức Cơ,Ia Pa lehanăn wăl krah Ayŭn Pa, ƀuh 5 anôk bruă ngă soh. Dŭm klei soh lu jing amâo hưn mthâo mnơ̆ng dhơ̆ng, kriê pioh amâo djŏ lehanăn amâo mâo pŏk mdhă hưn mthâo krĭng kriê pioh. Aduôn Ksor Hiền, Kơiăng khua knơ̆ng bruă mdrao mgŭn čar Gia Lai, mñă:

 “Hlăm wưng ti anăp, Knơ̆ng bruă srăng krơ̆ng kjăp hdră ngă bruă kñăm rơ̆ng hnơ̆ng tŭ jăk mơ̆ng mnuih blei yua hŏng dŭm mta êa drao gŭn, mnơ̆ng bi msiam ƀô̆ mta lehanăn mnơ̆ng ƀơ̆ng kơ mnuyih ƀuôn sang ti alŭ wăl. Hŏng klei gĭr amâo mâo krĭng kăm, msir mghaih djŏ hdră. Êpul ksiêm dlăng mkŏ mjing nanao êpul kăp ksiêm dlăng mnơ̆ng, kriê dlăng wăl anôk mnia mblei, mâo wăt kahan ksiêm hlăm êpul snăn boh tŭ nao ksiêm dlăng, msir mghaih dưi hưn nanao hŏng gưl dlông čiăng mâo hdră msir mghaih pral lehanăn djŏ guôp”.

Dŭm klei gĭr mđrăm mbĭt mơ̆ng dŭm gưl, dhar bruă ti Gia Lai đru mđĭ leh klei thâo săng mơ̆ng mnuih ƀuôn sang, anôk bruă duh mkra hlăm bruă hluê ngă djŏ hdră bhiăn, mbĭt anăn mjing wăl anôk mnia mblei êđăp ênang, hơĭt kjăp lehanăn kpă mngač./.