Anôk rang mdah mâo giăm 500m² mơ̆ng VOV ti anôk rang mdah “80 thŭn klei hnŭk êngiê – klei êđăp ênang – klei yâo mơak” mâo bi êdah leh hlăm dăl 80 thŭn mđrăm mbĭt hŏng klei mđĭ kyar lăn čar. VOV bi klin leh jih jang klei mĭn, klei hur har mơ̆ng jih jang phung ngă bruă klei mrâo, phung čih mkra dăp hdră, phung mă asăp, phung mbruă lehanăn jih jang mnuih mă bruă čiăng mjing dŭm gru kruak knhal kơ hƀuê ênuk yuôm bhăn mơ̆ng sang mđung asăp blŭ Việt Nam , msĕ si mmông mđung bi êdah hrue hưn klei êngiê kơ lăn čar 2/9/1945, hưn klei dưi bi blah Điện Biên Phủ, hưn klei dưi bi blah yan mnga 1975… - dŭm gru kruak knăl kơ hƀuê ênuk jhŏng ktang mơ̆ng lăn čar. Phạm Mạnh Hùng – K’iăng khua knơ̆ng kiă kriê sang mđung asăp blŭ Việt Nam lač:

 “Dŭm gru kruak knhăl yuôm bhăn, lehanăn mbĭt hŏng jih jang klei mlih mrâo mơ̆ng Đảng, klei mđĭ kyar hdră mă bruă, wăt kdrăp kreh knhâo, klei kiă kriê mơ̆ng sang mđung asăp blŭ, dưi nao mđrĭng hŏng dŭm hƀuê ênuk lăn čar, mâo bi êdah ênŭm hlăm anôk rang mdah mơ̆ng sang mđung asăp blŭ Việt Nam. Tơdah mnuih ƀuôn sang nao dlăng dưi thâo ƀuh kơ dŭm hbuê ênuk klei đĭ kyar hlăm 80 thŭn êgao mơ̆ng Sang mđung asăp blŭ Việt Nam, dơ̆ng hrue mkŏ mjing hrue 7/9 thŭn 1945 truh kơ wưng mlih mrâo ară anei. Hlăm grăp wưng hƀuê ênuk mđĭ kyar lăn čar mâo sang mđung asăp blŭ Việt Nam mđrăm mbĭt hlăm bruă cách mạng djuê ana”.

Phạm Mạnh Hùng lŏ mña: Hlăm jih wưng mkŏ mjing klei rang mdah, VOV srăng tiŏ nao phung knuă druh, phung ngă bruă klei mrâo, phung mbruă nao bi mguôp lehanăn ktrâo atăt kơ jih klei yăl dliê kơ hƀuê ênuk mơ̆ng Sang mđung asăp blŭ Việt Nam.

“Hŏng lu hdră mdê mdê, boh nik leh mnuih ƀuôn sang nao čuă dlăng anôk rang mdah srăng hmư̆ dŭm asăp blŭ Việt Nam, dưi ƀuh dŭm anôk bi hmô VR kơ hrue 2/9 ti wăl tač Ba Đình, hlăk Awa Hồ dlăng hră hưn mdah kơ klei hnŭk êngiê; amâodah klei kruak knăl yuôm bhăn mâo bi êdah hŏng dŭm asăp blŭ. Hmei srăng mdah dŭm kdrăp mă bruă mrâo mrang mơ̆gn Sang Mđung asăp blŭ Việt Nam, msĕ si hră klei mrâo điện tử Asăp blŭ Việt Nam, hră klei mrâo điện tử VTCNews, hdră mđung asăp kơ êlan klông lehanăn lŏ mâo mta mrâo jing hdră mđung asăp kơ êlan klông Duyên Hải; lehanăn lông ngă dŭm bruă dôk yua hlăm kdrăp mrô ară anei.

Klei rang mdah “Boh tŭ dưn ala čar – hlăm 80 thŭn kyua klei hnŭk êngiê – klei êđăp ênang – klei yâo mơak” ti anôk bruă rang mdah ala čar ti (Đông Anh, Hà Nội) pŏk ƀăng kơ mnuih ƀuôn sang nao čuă dlăng mơ̆ng hrue 28/8 - 5/9, ƀuăn srăng jing anôk jăk ba wĭt klei mơak mñai, lehanăn klei myưng m’ang kơ grăp čô mnuih Việt Nam.