Ară anei lu kdrêč êlan ti Êlan dơ̆ng prŏng mrô 28B găn dŭm să Phan Sơn, Tà Hine, Ninh Gia (Lâm Đồng) ngă leh bruă pŏk prŏng bô̆ êlan, dŭm kdrêč êlan dưi tuh bêtông. Hluê si kỹ sư Nguyễn Văn Thuận, pô ksiêm dlăng hdră ngă mkra bruă rŭ mdơ̆ng mrô 2, čiăng dưi hluê ngă djŏ wưng, êpul êya brei ba nao jih maĭ mŏk, mnuih mă bruă, hnêč ngă bruă hlăm hruê không.

 “Êpul êya ngă bruă ară anei dôk mtrŭt mđĭ pral hdră hluê ngă 4 mta bruă hlăm hdră mkra ƀô̆ êlan lehanăn 2 mta bruă hlăm hdră tuh bêtông. Brei hnêč ngă pral hlăm dŭm hruê không čiăng mjing klei jăk găl kñăm mđĭ wưng hluê ngă.

Hdră mkra mđĭ êlan dơ̆ng prŏng mrô 28B mâo boh taih dlông êbeh 68km, hŏng ênoh duh bi liê êbeh 1.400 êklai prăk, mâo Knơ̆ng bruă êlan klông Việt Nam ngă pô duh bi liê. Anei jing hdră phŭn, kñăm mkŏ dua krĭng hdră duh mkra Đà Lạt – Phan Thiết (dliê hŏng êa ksĭ), mđĭ hdră bi hgŭm krĭng lehanăn bi hrŏ wưng găn êrô ktuê êlan Ngŏ – Yŭ. Mphŭn rŭ mdơ̆ng mơ̆ng mlan 4.2024, truh ară anei hdră anei ngă leh êbeh 40% kdrêč bruă, êbeh 30 km êln dưi tuh bêtông, 40km ƀô̆ êlan lehanăn giăm 58km dưi lŏ tuh leh boh tâo.

Ti kčŭn čư̆ Đại Ninh – krĭng phŭn, 6 boh kban dưi mjêč hluê ngă. Trần Trung Hiếu, Khua knơ̆ng bruă kriê dlăng kban mrô 3, Knơ̆ng bruă 134 Việt Nam, brei thâo, hdră ktuê mkra gơ̆ng kban tinei luič lu hruê mmông, ƀiădah êpul dôk ngă bruă jih hruê mlam čiăng rơ̆ng bi leh hdră kčah ngă bruă.

 “Kdrêč mkra, ktir ngă gơ̆ng kban ti nah gŭ dleh dlan, luič lu hruê mmông. Truh mkrah mlan kơh leh, mrâo bi leh bruă ktir ngă gơ̆ng. Leh kdrêč anei, hmei mđĭ leh ênoh mnuih, mmông mă bruă srăng mtrŭt mđĭ pral hdră hluê ngă, rơ̆ng bi leh djŏ wưng mâo kčah jao. Hmei mă jih hruê mlam, b anao mnuih mă bruă, čiăng dưi ba jao hdră anei hlăm hruê 15/12 kơ anăp.

Hluê hdră kčah, hdră anei srăng ngă lh hlăm mlan 12/2025.  Khă snăn, klei hjan lu lehanăn gun kpăk hlăm bruă msir mghaih anôk ala ti dŭm kdrêč êlan ăt jing klei gun kpăk prŏng, hmăi truh kơ bruă hluê ngă./.