Wưng 2020 - 2025, Bruă Đảng Knơ̆ng bruă sang čư̆ êa čar Dak Lak gĭt gai jih jang hlue si klei blŭ “klă mnuih, klă bruă, klă boh tŭ” mjing klei bi mlih klă mngač hlăm dŭm mta bruă duh mkra, dhar kreh, ala ƀuôn, lĭng kahan - klei êđăp ênang. Hnơ̆ng đĭ kyar GRDP kah knar mâo 6,24%/thŭn; bruă tuh tia mkra mjing leh anăn êa pui êwa čuh jing leh klei mngač; hiu čhưn ênguê kơrŭ wĭt ktang; prăk hrui wĭt ba čhĭ kơ ala tač êngao kah knar mâo 11,2%/thŭn.  Anôk bruă nah gŭ wăl tuh tia mkra mjing dưi bi leh, iêo jak lu hdră bruă hnơ̆ng prŏng, pŏk êlan kơ anôk đĭ kyar mrâo.

 Mŭt hlăm Wưng 2025 - 2030, Bruă Đảng Knơ̆ng bruă sang čư̆ êa čar Dak Lak mâo hdră kñăm hnơ̆ng GRDP kah knar 11,5%/thŭn kơ dlông; prăk hrui wĭt kah knar grăp čô mnuih mâo 160 êklăk prăk/thŭn; ênoh ba čhĭ kơ ala tač êngao mâo êbeh 13 êklai USD; iêô jak 43 êklăk gưl tue hiu čhưn hŏng prăk hrui wĭt hlăm brô  97.150 êklai prăk; hrŏ ênoh gŏ êsei ƀun kah knar 2%/thŭn, hjăn krĭng mnuih djuê ƀiă hrŏ 3%/thŭn. Boh phŭn mđĭ kyar mâo bruă tuh tia mkra mjing, bruă lŏ hma yua kdrăp mrâo, hiu čhưn ênguê leh anăn bruă duh mkra êa ksĭ; mguôp hŏng klei mkra mlih wăl bi liê,  mđĭ bruă kreh knhâo kdrăp mrâo, mlih mrâo mbruă, bi mlih mrô leh anăn mđĭ kyar mnuih mă bruă hnơ̆ng jăk.

Nguyễn Đình Trung, Khua hlăm Anôk dlăng bruă Đảng, Khua dlăng bruă Đảng čar Dak Lak mñă klă, Klei bi kƀĭn tal anei srăng mâo klei kñăm kơ sa wưng đĭ kyar mrâo, bi mklă bruă klam atăt gai mơ̆ng Bruă Đảng Knơ̆ng bruă sang čư̆ êa čar hlăm bruă hlue ngă klei čang hmăng kpưn đĭ kơ mdrŏng mơ̆ng Dak Lak.

 “Đảng Knơ̆ng bruă sang čư̆ êa čar brei mkŏ mjing ngă bi jăk hdră êlan mơ̆ng Gưl dlông leh anăn păn kjăp hnơ̆ng kčah bruă klam hdră msir hlue si Hdră kčag mơ̆ng bruă Đảng čiăng lŏ dơ̆ng pŏk ngă hrăm mbĭt, kluôm leh anăn mâo klei tŭ dưn, boh nik rơ̆ng hdră kñăm đĭ kyar 8% kơ dlông thŭn 2025, mjing tur knơ̆ng čiăng kơ hdră kñăm đĭ kyar 2 ênoh mrô hlăm wưng ti anăp. Mđĭ ktang dŭm bruă ngă mtrŭt mjhar bi liê, lŏ dơ̆ng ngă hdră msir jih ai tiê čiăng mđĭ pral hnơ̆ng bi liê knŭk kna, boh nik dŭm hdră bruă phŭn. Hmao ruh mgaih klei dleh dlan mjing boh kdrŭt mđĭ kyar bruă duh mkra ala ƀuôn hlăm wưng kơ anăp.”

 Bruă Đảng Knơ̆ng bruă sang čư̆ êa čar Dak Lak bi mklă klei kñăm ksiêm dlăng hlăm wưng mrâo 2025 – 2030 jing: Mđĭ klei thâo gĭt gai, ai ktang bi kdơ̆ng mơ̆ng bruă Đảng; bi hgŭm, hrăm mbĭt, sa ai tiê ngă tŭ đưn klei kñăm bruă klam truh thŭn 2030. Mđĭ klei mkra mlih hră mơar, mđĭ ktang klei mkra mlih wăl hdĭp mda bi liê bruă mnia blei, mđĭ bruă duh mkra êngao knŭk kna đĭ kyar, mđĭ hnơ̆ng thâo mă bruă; mđĭ ktang bruă kriê dlăng ngăn dŏ leh anăn wăl hdĭp mda, mđĭ kyar ktang klei kreh knhâo - kdrăp mrâo, mlih mrâo mbruă, mlih mrô, mlih mtah, đru mkŏ mjing čar Dak Lak hơĭt kjăp, mđĭ kyar, mdrŏng sah, jăk siam, dhar kreh, đăo knang hŏng lăn čar mŭt hlăm ênuk mrâo - ênuk kpưn đĭ mơ̆ng djuê ana Việt Nam”.