Hlăm 2 hruê, 200 čô hriăm jing phung knuă druh, phung mă bruă knŭk kna gưl čar leh anăn gưl să srăng hmư̆ hră mơar hdră bhiăn mrâo, mtô bi hriăm klei thâo mbha, msir hră mơar, bi blŭ hrăm, msir boh klei dleh dlan leh anăn ba yua kdrăp mrô hlăm bruă drông mnuih ƀuôn sang.

Hlue si Ngô Kiểm, Khua ksiêm dlăng čar Lâm Đồng, bruă mkŏ mjing adŭ mtô bi hriăm anei amâo djŏ knŏng đru mđĭ hnơ̆ng jăk, tŭ dưn bruă drông mnuih ƀuôn sang ôh ƀiădah lŏ bi êdah klei gĭr mkŏ mjing hră mơar doh, tŭ dưn, mkra mđĭ klei đăo knang mnuih ƀuôn sang. Mbĭt anăn mñă klă, tơdah êpul nah gŭ ngă jăk, hmao msir mơ̆ng mphŭn, srăng dưi mkhư̆ boh klei kčŭt hưn êgao gưl, đru yua tŭ dưn knŭk kna 2 gưl ti nah gŭ.