Phung khua kiă kriê Đảng, Knŭk kna mâo ngă leh dŭm klei bhiăn bi hdơr hŏng klei kdrăm k’ah hĭn, lŏ bi hdơr dŭm gru kruak knăl mơ̆ng hƀuê ênuk lăn čar pô: Mơ̆ng sa ala čar mthŭl mluk ƀun ƀin lĕ nanao hlăm klei ala tač êngao ap gư̆ ktư̆ juă, ară anei ti gŭ hla čhiăm gru mơ̆ng Đảng cộng sản Việt Nam, jih jang djuê ana kgŭ kdơ̆ng, mdlưn klei kiă kriê măk ƀai mơ̆ng phung plah ala, dưi rŭ mdơ̆ng sa lăn čar Việt Nam hnŭk êngiê, êđăp ênang, knŭk kna mơ̆ng mnuih ƀuôn sang, kơ mnuih ƀuôn sang, kyua mnuih ƀuôn sang.

Mbĭt hŏng knăm bi hdơr jing klei ruĕ kahan, bi ruĕ mâo giăm 16.000 čô knuă druh, lĭng kahan, kahan ksiêm lehanăn phung bi ala mơ̆ng dŭm gưl mnuih ƀuôn sang, djăp djuê ana...

Hlăm klei ruĕ mâo êpul êdeh đoh knong, mâo djăp êpul kahan mơ̆ng kahan êa, kahan êdeh phiơr răng mgang wăl adiê, kahan knong, kahan êdeh sar...hlue anăn mâo lu êpul kahan mdê, lehanăn kahan mơ̆ng 4 ala čar mâo Russia, China, Lào, Campuchia ăt tiŏ hriê êpul pô hriê ruĕ mbĭt.

Knăm bi hdơr, ruĕ kahan, bi ruĕ anăn jing kñăm bi klă klei jing, ai ktang, lehanăn tŭ dưn mơ̆ng hƀuê ênuk prŏng prĭn mơ̆ng klei kgŭ krŭ kdơ̆ng mlan 8, lehanăn klei mkŏ mjing lăn čar Việt Nam Dân chủ cộng hòa, ară anei jing lăn čar yang ƀuôn ngă phŭn êngiê Việt Nam hlăm hƀuê ênuk bi blah rŭ mdơ̆ng lăn čar, răng mgang lăn čar, djuê ana ti gŭ klei kiă kriê kjăp mơ̆ng Đảng Cộng sản Việt Nam.

Mơ̆ng anăn, lŏ bi kjăp klei ksŭl mbŭ klei đăo knang mơ̆ng kluôm Đảng, jih jan gmnuih ƀuôn sang kơ bruă klam mơ̆ng Đảng Cộng sản Việt Nam; đăo kang kơ hdră êlan mơ̆ng Đảng tă leh čiăng atăt lăn čar čhuang nao hlăm ênuk gưl mrâo./.