Hlăm wưng mơ̆ng 2020 -2025, bruă tuh tia leh anăn pui kmlă mkŏ mjing gru kruăk ti Khánh Hoà, đru mđi prăk hrui wĭt kah knar grăp čô mâo êbeh 113 êklăk prăk sa čô. Bruă tuh tia ti Vân Phong, pui klă ti Dhŭng Khánh Hoà dưi nao mbĭt hŏng bruă hiu čhưn ênguê Nha Trang leh anăn Cam Lâm. Dŭm klei bi knăl anei brei ƀuh, bruă tuh tia leh anăn pui kmlă dôk jing dua kmeh gơ̆ng mrâo, ba čar Khánh Hoà nao hlăm ênuk đĭ kyar 2 ênoh mrô”.

Klei hưn mdah kđi čar hlăm klei kƀĭn kluôm bruă Đảng čar Khánh Hoà gưl tal 1, wưng thŭn 2025 – 2030 mñă ktang, čiăng klă sĭt jing kmeh gơ̆ng bruă tuh tia leh anăn pui kmlă, čiăng mtrŭt mđĭ bruă mkŏ wĭt, mlih mrâo leh anăn mđĭ boh tŭ dưn knơ̆ng bruă knŭk kna hluê si hdră anôk mnia mblei, bi mâo djăp hnơ̆ng čuăn tar rŏng lăn kơ bruă kiă kriê. Klei anei ăt djŏ hŏng hdră tă mđĭ kyar mơ̆ng knơ̆ng bruă hlăm čar. Trịnh Thị Hồng Vân, khua knơ̆ng bruă Yến sào Khánh Hòa, brei thâo:

Knơ̆ng bruă srăng ba bruă mkra hruh čĭm iăt jing bruă phŭn. Knơ̆ng bruă srăng bi khuăt, bi mŭt mbĭt, bi kruh dŭm anôk bruă ngă bruă amâo mâo tŭ dưn. Hmei srăng mtrŭt mđĭ klei mlih mrô. Boh nik, êpul mkra mjing srăng lŏ dơ̆ng duh bi liê masin mrâo mrang čiăng bi mâo djăp klei čiăng”.

Mbĭt hŏng bi lar dŭm klei găl bruă tuh tia, Khánh Hoà mdưm mta kñăm iêo jak dŭm hdră mrâo mrang msĕ si mnơ̆ng yua điện tử, bán dẫn, klei thâo mĭn anak mnuih mkra mjing, anôk čih pioh ala čar. Čiăng mâo mta kñăm anei, čar bi mguôp hŏng gưl dlông bi kluôm êlan klông, mkŏ mơ̆ng tač êdeh phiơr prŏng Vân Phong, Cam Ranh truh kơ êlan dơ̆ng pral Dưr Dhŭng, Ngŏ –Yŭ leh anăn êlan êdeh treng pral. Trần Minh Chiến, khua êpul kriê dlăng anôk bruă duh mkra leh anăn bruă tuh tia čar Khánh Hoà lač, leh čar mâo lăn doh, pui kmlă, êa jua hơĭt, bruă đru kluôm dhuôm, phung duh bi liê srăng mâo klei hơĭt duh bi liê sui.

“Klei găl jing dŭm klei čuăl mkă mbha čuê dưi bi klă. Kluôm čar  Khánh Hoà jing sa boh kŭm păn, êpul kriê dlăng anôk bruă duh mkra leh anăn tuh tia jing kŏ kŭm păn, đru kơ čar Khánh Hoà đĭ kyar 2 ênoh mrô. Mta kñăm jing sơnăn ƀiădah srăng ruah phung duh bi liê mâo ai dưi, hdră dưi ngă”.

Nao mbĭt hŏng bruă tuh tia, jing kmeh gơ̆ng pui kmlă. Leh bi mŭt mbĭt, klei găl anei mơ̆ng čar Khánh Hoà lŏ êdah hĭn. Čar mdưm mta kñăm mđĭ kyar pui kmlă hŏng ai angĭn ti êa ksĭ, pui kmlă hŏng pil yang hruê, pui êa LNG leh anăn pui kmlă hạt nhân, nao mbĭt hŏng kdrăp klei pui mrâo mrang. Boh nik dua hdră pui kmlă hạt nhân ti Dhŭng Khánh Hòa dưi dlăng jing hdră êlan ala čar, pŏk klei găl ko čar mâo wăl đĭ kyar mrâo, nao mbĭt hŏng bruă tuh tia đru, hdră mnêč leh anăn mtô mnuih mă bruă hnơ̆n jăk. Hồ Xuân Ninh,  khua knơ̆ng bruă tia mnia mblei Khánh Hòa brei thâo: Čar dôk kñăm ai dưi kơ dŭm hdră yuôm bhăn anei:

Ară anei, tla prăk ruh mgaih anôk ala amâo lŏ djŏ boh klei prŏng, dưi ngă pral. Rơ̆ng kơ klei čuăn mmông bi êran pui kmlă, rơ̆ng kơ klei mkra mjing leh anăn ba yua. Čiăng uêñ mĭn kơ ai dưi hnơ̆ng jăk, bi mâo djăp klei čiăng kơ dŭm knơ̆ng bruă”.

Čiăng bi sĭt klei hmăng hmưi mđĭ ktar hŏng bruă tuh tia leh anăn pui kmlă, čar Khánh Hòa ba mdah lu hdră êlan, mlih mrâo klei ngă hră mơar knŭk kna, bi hrŏ mmông ngă bruă, iêo jak ai dưi mơ̆ng yang ƀuôn, mtrŭt mđĭ klei bi mguôp knŭk kna – êngao knŭk kna hlăm bruă rŭ mdơ̆ng, pui kmlă, klei mrâo mrang leh anăn mlih mrô, kñăm mtô mjuăt mnuih mă bruă, ba yua KPI, mđĭ hĭn bruă klam hlăk mblang mơ̆ng anôk bruă Knŭk kna, mkŏ mjing klei găl čiăng kơ knơ̆ng bruă jing phŭn duh bi liê. Khua bruă Đảng čar Khánh Hòa Nghiêm Xuân Thành mñă ktang:

“Čiăng kơ čar Khánh Hòa đĭ kyar 2 ênoh mrô, mđĭ prăk hrui wĭt hơĭt kjăp, amâo mâo êlan mkăn ôh jing bruă tuh tia. Tơdah bruă tuh tia amâo mâo hdră êlan kdlưn hĭn, amâo srăng dưi bi leh mta kñăm anei”.

 Mă bruă hŏng êpul khua bruă Đảng čar Khánh Hoà, Khua bruă kƀĭn ala Trần Thanh Mẫn bi yuôm hdră tă mơ̆ng čar kơ klei đĭ kyar:

“Klei găl mơ̆ng čar Khánh Hoà leh bi mŭt mbĭt. Anăn jing klei găl hjăn, ai bi ktưn, wăl anôk leh anăn boh kdrŭt đĭ kyar mrâo. Bih nik jing bruă duh mkra êa ksĭ, hiu čhưn ênguê, logistics, kdrŭn ksĭ, bruă tuh tia mkra mjing, pui kmlă doh, anôk bruă čih pioh. Srăng dlăng kluôm, mđĭ ai ktang, mgaih msir mtam klei êdu kƀah”.

          Khánh Hoà dôk mŭt hlăm wưng mrâo, hŏng bruă tuh tia leh anăn pui kmlă jing 2 kmeh gơ̆ng. Anei amâo djŏ knŏng mta kñăm mđĭ kyar bruă duh mkra, ƀiădah lŏ bi klă kơhưm čar hlăm wưng ñŭ kma tar rŏng lăn, mđing truh ko anôk bruă tuh tia, pui kmlă doh leh anăn ƀuôn prŏng mrâo mrang hlăm thŭn 2030. Mbĭt anăn đru ngă hdră bi mâo djăp pui kmlă mơ̆ng ala čar./.