Hrue mbrue (10/9), ti anôk bruă hŏng knơ̆ng bruă sang čư̆ êa čar Khánh Hòa, K’iăng khua kiă kriê phŭn bruă djuê ana lehanăn klei đăo Hồ Văn Niên mta brei mâo klei knŭk kna kiă kriê kjăp bruă djuê ana lehanăn klei đăo, rơ̆ng kiă kriê bruă jăk mơ̆ng hdră êlan sang čư̆ êa dua gưl, mđring hŏng bruă mđĭ klei hdĭp mda, bi hrŏ ƀun hŏng klei kjăp kơ mnuih djuê ƀiă.

Leh klei bi mŭt mbĭt hŏng Ninh Thuận, čar Khánh Hòa mrâo, mâo êbeh 2,2 êklăk čô mnuih. Čar mâo 36 djuê ana hŏng 290 êbâo čô mnuih, truh êbeh 13% ênoh mnuih hlăm kluôm čar, mâo 12 klei đăo dôk ngă bruă, hŏng giăm 900 anôk bi kƀĭn, 650 êbâo čô phung đăo, lehanăn giăm 8.800 čô phung khua kiă kriê klei đăo. Dŭm thŭn êgao,  Khánh Hòa mđing kơ bruă đru mđĭ kyar klei hdĭp mda mnuih djuê ƀiă. Wưng thŭn   2021-2025, hnơ̆ng ênoh gŏ sang ƀun hlăm krĭng hrŏ kah knar êbeh 5% grăp thŭn. Čar dưi bi leh hdră lăm lui sang hlang mtih kđuh sang tĭ rưč êlâo kơ hrue kčah 4 mlan, hŏng giăm 3.500 boh sang mâo mdơ̆ng mrâo lehanăn mkra wĭt./.