Hlăm wưng êgao, čar Khánh Hòa mâo leh lu klei bi mlih klă sĭt hlăm bruă hrăm mbĭt hŏng anôk bruă duh mkra, mjing klei găl mtrŭt mđĭ kyar bruă duh mkra – ala ƀuôn.  Ayŏng Lê Thanh Vân, Kơiăng khua anôk bruă MiwaVina (Wăl tuh tia mkra mjing Suối Dầu, să Suối Dầu) brei thâo, anôk bruă mrâo mâo Anôk kriê dlăng hdră duh mkra, wăl tuh tia mkra mjing čar Khánh Hòa đru mkra mlih hră mơar duh bi liê pŏk mlar sang maĭ pral, klei ngă hră mơar knŏng sui hlăm 5 hruê.

“Anôk bruă duh mkra hmei jing anôk bruă duh mkra điêt lehanăn man dưn, 100% prăk duh mơ̆ng ala tač êngao. Anôk kriê dlăng amâo dah dŭm anôk bruă hrăm mbĭt, ktrâo lač djăp mta hră mơar hŏng klei khuăt, djŏ hdră bhiăn. Anei jing mta phŭn yuôm bhăn, mjing ai lar bra jak iêu phung duh bi liê mrâo mđing dlăng.

Hdră mkra mlih bruă ngă hră mơar ti Anôk kriê dlăng wăl duh mkra, wăl tuh tia mkra mjing čar mâo dŭm anôk bruă duh mkra hlăm lehanăn êngao čar tĭng dlăng myuôm. Lê Hồng Phương, Kơiăng khua anôk kriê dlăng wăl duh mkra, wăl tuh tia mkra mjing čar Khánh Hòa brei thâo, klei ngă hră mơar mkra mlih hră mơar duh bi liê dưi hrŏ mơ̆ng 10 hruê dôk 5 hruê, anăp truh, gĭr bi hrŏ dôk 3 hruê.

 “Hmei mđing kơ phung duh bi liê hlăm wăl anôk duh mkra kƀĭn sa anôk, boh nik phung duh bi liê hlăm wăl tuh tia mkra mjing čiăng ngă hră mơar djŏ hdră kčah sui hlăm brô 10 hruê ară anei dôk 5 hruê, tơdah pral, hmei srăng bi hrŏ dôk 3 hruê. Yuôm bhăn hĭn jing dŭm anôk bruă duh mkra ba hră mơar, anôk bruă srăng ksiêm dlăng lehanăn ktrâo lač djŏ guôp čiăng kơ anôk bruă duh mkra pral ngă leh, thiăm mbŏ, rơ̆ng hră mơar mâo djăp hnơ̆ng tŭ jăk.

Čar Khánh Hòa dôk mtrŭt mđĭ kyar bruă mkra pui kmlă, mđing truh kơ bruă bi hrŏ klei jưh knang hlăm nhiên liệu hóa thạch, rơ̆ng klei êđăp ênang pui kmlă ala čar lehanăn hdră mđĭ kyar mtah, hơĭt kjăp. Truh kơ mlan 6/2025, Khánh Hòa mâo 57 hdră pui kmlă lŏmkra mjing hŏng hnơ̆ng giăm 3.750 MW, mâo pui kmlă êran hŏng ai angĭn, pui kmlă êran hŏng pil yang hruê, phŭn pui kmlă êran hŏng êa lehanăn pui kmlă êran hŏng pil sang hruê ti dlông čuôr sang, truh giăm 7% hnơ̆ng mâo pui kmlă lŏ wĭt mkra mjing hlăm kluôm ala čar. Boh nik, krĭng nah Dưr čar đĭ kyả dŭm hdră bruă prŏng msĕ si Phŭn pui kmlă BOT Vân Phong 1 hŏng hnơ̆ng 1.320 MW, đru mguôp hlăm brô 3% hlăm hnơ̆ng pui kmlă ala čar. Ti krĭng nah Dhŭng, dŭm êpul grŭp prŏng msĕ si BIM, Trung Nam duh dŭm êbâo êklai prăk hlăm êpul mkra pui kmlă êran hŏng pil yang hruê, hŏng ai angĭn mguôp hŏng bruă mkra hra doh, ba yua lăn sah kba.

Čar Khánh Hòa bi mklă bruă pui kmlă jing 1 hlăm 4 hdră phŭn, mâo mta kñăm jing anôk bruă pui kmlă ala čar hŏng hnơ̆ng mâo tĭng truh 14.000 MW hlăm thŭn 2030, mâo pui kmlă êran hŏng pil yang hruê, hŏng ai angĭn, hŏng pui hạt nhân. Čar dôk mđĭ bruă hluê ngă dŭm hdră bruă phŭn msĕ si Sang maĭ pui kmlă Ninh Thuận, phŭn pui kmlă êran hŏng êa Bác Ái, LNG Cà Ná… Mbĭt anăn, mđing kơ bruă dhiang ba pui kmlă, ba mdah hdră mtrŭn jăk găl jak iêu klei duh bi liê, mtrŭt mjhar klei sa ai hlăm mnuih ƀuôn sang čiăng hluê ngă mta kñăm mđĭ kyar bruă pui kmlă doh, hơĭt kjăp.

Hồ Xuân Ninh, Khua knơ̆ng bruă mnia mblei čar Khánh Hòa, brei thâo pui kmlă hơĭt kjăp amâo djŏ knŏng đru mguôp hnư hrui wĭt hlăm ngăn prăk knŭk kna ƀiădah lŏ mjing klei găl čiăng kơ alŭ wăl iêu mthưr klei duh bi liê dŭm hdră tuh tia mkra mjing mrâo.

“Brei mjêč ba yua hnơ̆ng čuăn ruah dŭm klei mđing tal êlâo mơ̆ng dŭm mta bruă mâo bo tŭ yuôm lu, kdrăp mrâo, jăk hŏng wăl hdĭp mda, mnơ̆ng mâo boh tŭ kreh knhâo – kdrăp mrâo, đru mđĭ hn ư hrui wĭt kơ ngăn prăk knŭk kna. Wăl tuh tia mkra mjing msĕ si Dốc Nắng, Trảng É, Cà Ná 1 ăt ruah phung duh bi liê mâo hdră kčah duh bi knar, pral jak ieu dŭm anôk bruă duh kơ dŭm hdră mkăn.

Anôk bruă nah gŭ phŭn dưi duh bi liê, wăl anôk duh bi liê dưi mkra mđĭ, kdrăp mkra mjing, pui kmlă doh dưi mkra mjing, hdră hiu čhưn ênguê dưi krŭ wĭt pral jing klei găl čiăng kơ Khánh Hòa mđĭ kyar bruă duh mkra pral, mkra mđĭ klei hdĭp mnuih ƀuôn sang. Leh bi mŭt čar, pŏk mlar wăl anôk đĭ kyar, Khánh Hòa lŏ mâo mta kñăm truh thŭn 2030 jing ƀuôn prŏng hlăm Gưl dlông, đĭ kyar bruă duh mkra truh 12%/thŭn, hnư hrui wĭt kah knar đĭ 14%/thŭn. Trần Quốc Nam, Khua anôk bruă sang čư̆ êa čar Khánh Hòa brei thâo:

“Bruă Đảng, anôk bruă sang čư̆ êa čar bi mklă srăng ruh mtlaih dŭm klei gun kpăk prŏng djŏ tuôm kơ klei bhiăn lehanăn anôk bruă nah gŭ, boh nik dŭm hdră dôk ksŭn, mđing mđĭ kyar anôk bruă êlan klông lehanăn wăl tuh tia mkra mjing, mjing boh kdrŭt đĭ kyar mrâo. Mtrŭt mđĭ kyar 4 mta bruă phŭn, mâo tuh tia mkra mjing – pui kmlă, hiu čhưn – bruă nah tluôn lehanăn bi mrâo mrang ƀuôn prŏng, mđĭ hdră mlih mrô, mđing truh mta kñăm bruă duh mkra mrô mâo 1/3 hnơ̆ng mâo mnơ̆ng dhơ̆ng hlăm thŭn 2030./.