Klei livestream dưi mkŏ mjing hŏng klei nao hgŭm mơ̆ng Êpul bruă lŏ hma doh Krông Pač, mnuih ƀuôn sang,êpul đoàn viên, êdam êra alŭ wăl mbĭt hŏng dŭm anôk bruă duh mkra đru logistics lehanăn dŭ mdiăng. Hdră anei dưi hưn mdah hlăm lu kdrăp mrô mkăn. Blŭ hrăm ti knăm livestream, Khua bruă Đảng să Êa Knuêč Ngô Thị Minh Trinh mñă klă:

“Mta kñăm mơ̆ng klei livestream anei amâo djŏ knŏng mjưh ti bruă dưi ba čhĭ dŭm ton boh durian, ƀiădah yuôm bhăn hĭn jing hưn mthâo rup, mnơ̆ng ƀơ̆ng ƀuôn sang; mtrŭt mnuih ƀuôn sang nao hgŭm hlăm hdră mlih mrô, mơ̆ng bruă hriăm čhĭ mnơ̆ng online truh kơ bruă hưn mthâo dhar kreh alŭ wăl; mbĭt anăn mñă hnơ̆ng tŭ jăk mnơ̆ng lŏ hma Dak Lak hlăm wăl anôk mnia mblei”.

Mbĭt hŏng Khua bruă Đảng să, mnuih ƀuôn sang alŭ wăl ăt nao hgŭm hưn mthâo mnơ̆ng dhơ̆ng. Mduôn Hoàng Thị Nguyên, 70 thŭn, hdĭp ti Tân Sơn, să Êa Knuêč hơ̆k mơak hlăk gưl tal êlâo ñu dưi djă micrro hưn mthâo mnơ̆ng ƀuôn sang pô hluê hdră klă anăp.

“Mâo bruă Đảng să, khua bruă Đảng lehanăn dŭm dhar bruă mơ̆ng să mâo dŭm bruă khădah 70 thŭn leh ƀiădah ăt gĭr hur har nao hgŭm čiăng kơ phung čô anak mâo klei mơak mbĭt, gŏ sang si srăng ngă čiăng dưi mâo lu boh durian ba čhĭ kơ ala tač êngao lehanăn pô ăt ktưn hưn kơ čô anak pô, jăk êdi leh snăn.

Hŏng mnuih ƀuôn sang, bruă knŭk kna alŭ wăl amâo djŏ knŏng hrăm mbĭt hŏng hdră mtrŭn amâo dah hră mơar, ƀiădah wăt hŏng bruă ngă klă klơ̆ng, ba knuă druh giăm mnuih ƀuôn sang hĭn. Klei phung khua kiă kriê hrăm mbĭt hŏng mnuih ƀuôn sang hưn mdah jing hdră ngă klă sĭt čiăng lar bra ai tiê mlih mrâo, mbĭt anăn bi kjăp klei đăo knang mơ̆ng mnuih ƀuôn sang hŏng bruă knŭk kna alŭ wăl. Mai Đình Thọ, Khua êpul hgŭm bruă lŏ hma doh Krông Pač, bi mni klei mĭn mrâo anei.

Kâo bi kngăr êdi hŏng sa čô khua bruă Đảng amâo djŏ knŏng mđing kơ hdră kiă kriê, gĭt gai ti alŭ wăl ƀiădah lŏ mđing đru kơ mnuih ƀuôn sang hluê klei mĭn čhĭ mnơ̆ng hŏng hdră online. Klei ngă anei đru kơ ƀĭng ngă lŏ hma mjĕ hŏng hdră mrâo, đru mđĭ boh tŭ yuôm mnơ̆ng dhơ̆ng lehanăn ba wĭt boh tŭ bruă duh mkra lu. Kâo mĭn, sa čô khua bruă Đảng snăn jăk êdi ,jĕ giăm, klă sĭt hrăm mbĭt hŏng mnuih ngă lŏ hma tui duah hdră êlan jăk kơ mnuih ƀuôn sang, mđing kơ dŭm bruă ngă klă klơ̆ng hlăm klei hdĭp mnuih ƀuôn sang tinei.

Klei livestream jak iêu dŭm êbâo čô mnuih dlăng lehanăn lu klei kuôl kă blei mnơ̆ng dưi bi tŭ ư. Amâo djŏ knŏng đru kơ anôk hrui blei mnơ̆ng lŏ hma, hdră anei lŏ kơ mnuih ƀuôn sang tui hriăm kơ hdră hưn mthâo mnơ̆ng dhơ̆ng hŏng kdrăp mrô, mjing klei mưng ngă bruă duh mkra – mnia mblei mguôp hŏng wăl anôk mrâo ară anei.

Klei khua bruă Đảng să Êa Knuêč, čar Dak Lak pô mtam livestream čhĭ boh durian hruê anei dưi tĭng dlăng jing knhuang nao klă klơ̆ng kñăm bi sĭt ai tiê Hdră mtrŭn 57-NQ/TW kơ bruă ba yua kdrăp mrâo, mbĭt anăn bi êdah klei ƀuăn “Giăm mnuih ƀuôn sang” hŏng bruă ngă klă sĭt mơ̆ng phung khua êmua alŭ wăl hlăk hluê ngă bruă knŭk kna 2 gưl./.