Khua gĭt gai Hun Sen mñă klă, Campuchia amâo srăng wor ôh klei đru, klei khăp mơ̆ng Việt Nam hlăm wưng êlâo dih ăt msĕ mơh ară anei. Hlăm dŭm klei lông dlăng mbĭt mơ̆ng alŭ wăl leh anăn tar rŏng lăn ară anei, dua ala čar lŏ dơ̆ng bi mguôp kjăp hĭn hlăm dŭm mta bruă mơ̆ng bruă kđi čar, bruă duh mkra mnia mblei, bruă lĭng kahan, klei êđăp ênang.

Khua bruă kƀĭn ala Trần Thanh Mẫn mñă klă, Đảng, knŭk kna Việt Nam dlăng yuôm bhăn leh anăn mđing tal êlâo kơ bruă bi kjăp leh anăn mđĭ hĭn klei mjĕ giăm, klei bi hgŭm knhuah gru, bi mguôp kluôm dhuôm, hơĭt kjăp Việt Nam – Campuchia, kyua boh tŭ dưn kơ mnuih ƀuôn sang dua ala čar, kyua klei êđăp ênang hơĭ kjăp, mđĭ kyar alŭ wăl leh anăn tar rŏng lăn. Khua bruă kƀĭn ala Trần Thanh Mẫn mñă kơ dua tĭng lŏ dơ̆ng mlih mrâo leh anăn bi lu jơr dŭm hdră hâo hưn čiăng kơ mnuih ƀuôn sang, boh nik jing phung mda asei dua ala čar thâo săng klă kơ klei bi hgŭm knhuah gru, bi mguôp kluôm dhuôm Việt Nam – Campuchia.