Ksiêm kơ anôk rŭ mdơ̆ng phŭn pui, Khua gĭt gai Đảng Tô Lâm hmư̆ leh klei hâo mdah kơ bruă čuăl mkă, kơ hnơ̆ng prŏng, klei dôk mtrŭt mjhar, ngă bruă čiu hnô čiăng kơ mnuih ƀuôn sang hơĭt ai tiê kbiă mơ̆ng anôk pioh kơ bruă rŭ mkra phŭn pui, hŏng klei ênưih. Khua gĭt gai Đảng mtă brei ngă bi pral hdră êlan mă bruă, ba mdah hŏng knŭk kna ksiêm dlăng, bi mklă kơ ênoh bi liê, rơ̆ng kơ bruă knuă mâo rŭ mkra djŏ hdră.

Leh kơ anăn, Khua gĭt gai Đảng nao ti anôk mphŭn rŭ mkra sang ngă lu mta bruă, adŭ hriăm lehanăn dŭm bruă pioh đru kơ bruă- Sang hră mtô bi hriăm hđeh điêt Phước Dinh, kdriêk Thuận Nam. Anei jing sa bruă yuôm bhăn êdi mâo mprăp djăp kdrăp mtô bi hriăm, hŏng ênoh bi liê jih jang truh 12 êklai prăk mâo khua gĭt gai Đảng mđup brei. Ăt tlam hrue anăn, Khua gĭt gai Đảng mbĭt hŏng êpul khua prŏng nao čuă kdrŭn Cà Ná. ƀri wưng anei, Khua gĭt gai Đảng Tô Lâm lehanăn êpul ngă bruă gưl dlông nao čuă leh ƀuôn mkra mjing mnơ̆ng hŏng lăn čeh Bàu Trúc, ti wăl krah Phước Dân, kdriêk Ninh Phước.