Aguah mbruê 25/9, ti sang Bruă Kƀĭn Ala mkŏ mjing gưl kƀĭn klă klơ̆ng Klei kƀĭn kluôm phung bi ala bruă Đảng Bruă Kƀĭn Ala gưl tal 1, wưng thŭn 2025 – 2030. Klei kƀĭn kluôm mâo akŏ “Mkŏ mjing anôk bruă Đảng kpă ênô, kjăp ktang kluôm dhuôm; gĭt gai Bruă Kƀĭn Ala mlih mrâo ktang phĭt, mđĭ hĭn hnơ̆ng tŭ jăk, boh tŭ dưn klei ngă bruă, kjăp mŭt hlăm ênuk đĭ kyar mdrŏng ktang, mrâo mrang, yâo mơak mơ̆ng djuê ana”.Hluê si klei hưn mdah kđi čar, hlăm wưng thŭn 2020 – 2025, Bruă Kƀĭn Ala dưi bi leh jăk dŭm hdră êlan, hdră kčah mâo leh, hmao mgaih msir, tŭ dưn lu bruă klam bluh mrâo bi mâo djăp klei čuăn mrâo mơ̆ng lăn čar ti gŭ klei gĭt gai mơ̆ng Đảng. Bi hlăm bruă mkŏ mjing, ngă bi kluôm dŭm hdră êlan, klei bhiăn lăn čar mâo lu klei bi mlih hŏng klei mbruă. Hlăm anăn, êdah êdi jing bi klă hdră mtrŭn mkra mlih, bi mbŏ đa đa mta mơ̆ng hdră bhiăn phŭn thŭn 2013, dŭm hdră bhiăn kơ êpul mă bruă, dŭm hdră mtrŭn kơ bruă mkŏ dăp anôk bruă knŭk kna gưl čar, mkŏ dăp anôk bruă knŭk kna gưl ƀuôn hgŭm, ba mdah lu hdră êlan bi hơĭt klei hdĭp yang ƀuôn hŏng klei hơĭt kjăp, ba wĭt boh tŭ dưn klă klơ̆ng kơ mnuih ƀuôn sang…

Êngao kơnăn, bruă ktuê dlăng ƀrư̆ hruê ƀrư̆ klă klơ̆ng, bruă hŏng tač êngao dưi hluê mgă kluôm dhuôm…Nao hgŭm leh anăn blŭ gĭt gai hlăm klei kƀĭn, Khua gĭt gai Đảng Tô Lâm lač klă lăn čar dôk mŭt hlăm ênuk đĭ kyar mrâo hŏng mta kñăm lu sơnăk, čiăng kơ dŭm gưl bruă Đảng nah gŭ, phung bi ala Bruă Kƀĭn Ala, knuă druh, đảng viên, phung mă bruă knŭk kna, mnuih mă bruă čiăng mđĭ hĭn klei gĭr bruă kđi čar, mlih mrâo klei mĭn, gĭt hlăm klei ngă bruă. Khua gĭt gai Đảng Tô Lâm  bi êdah 2 klei čuăn, 5 hdră tă klei ngă bruă kñăm čiăng kơ klei kƀĭn kluôm bi trông, bi klă, bi mbŏ, bi kluôm, bi tŭ ư hluê ngă hlăm wưng kơ anăp, hlăm anăn čiăng mđĭ hĭn knhuah mnuih ƀuôn sang hlăm djăp mta bruă mơ̆ng Bruă Kƀĭn Ala. Bruă Kƀĭn Ala Việt Nam srăng bi mguôp kđeh êrah hŏng mnuih ƀuôn sang, klă sĭt jing Bruă Kƀĭn Ala mơ̆ng mnuih ƀuôn sang, kyua mnuih ƀuôn sang, kơ mnuih ƀuôn sang, Amâo djŏ knŏng hlăm klei blŭ, ƀiădah hlăm grăp hdră bhiăn, hlăm grăp klei ksiêm êmuh, grăp hdră kčah mtrŭn, srăng mđing truh kơ mta kñăm gưl dlông hĭn: klei yâo mơak, trei mđao, klei êngiê mơ̆ng mnuih ƀuôn sang leh anăn klei mdrŏng ktang mơ̆ng lăn čar.