Hruê 8/6, leh knăm drông klă sĭt, ti Anôk bruă knŭk kna, Khua knŭk kna Lê Minh Hưng leh anăn Khua knŭk kna Thái Lan Anutin Charnvirakul mkŏ mjing klei bi trông. Dua Khua knŭk kna bi êdah klei sa ai kơ klei đĭ kyar ktang mơ̆ng klei bi hgŭm Việt Nam – Thái Lan hlăm 50 thŭn yap mơ̆ng leh mkŏ mjing klei bi hgŭm hŏng tač êngao hlăm thŭn 1976; ksiêm dlăng klei bi hgŭm ară anei dôk hlăm wưng đĭ kyar jăk siam mơ̆ng êlâo truh ară anei, hŏng tur knơ̆ng đăo knang kđi čar kjăp, bi hgŭm bruă duh mkra pral kdal leh anăn mjĕ êrô mnuih ƀuôn sang ƀrư̆ bi mguôp.

Hlăm bruă duh mkra, dua khua gĭt gai tŭ ư pŏk ngă tŭ dưn Hdră bruă “Tlâo mkŏ”; mđĭ klei mkŏ êlan klông, logistics, êlan êdeh phiơr leh anăn hiu čhưn ênguê; ksiêm dlăng mđĭ kyar dŭm ktuê êlan jơ̆ng, êlan ktuê hang ksĭ mkŏ dua ala čar leh anăn krĭng krĭng Mê Kông; mđĭ lar boh tŭ klei bhiăn Knơ̆ng bruă bi hgŭm mnia blei Việt Nam – Thái Lan; mkhư̆ klei gun kpăk bruă mnia blei, mjing klei găl kơ mnơ̆ng dhơ̆ng ba čhĭ ti dua ala čar; gĭr hnưm mâo klei kñăm prăk mnia blei 25 êklai USD leh anăn mđing kơ 50 êklai USD hlue si hdră bi knar, kjăp. Dua Khua knŭk kna bi mklă klei gĭr pŏk ngă tŭ dưn klei kuôl kă dưi mâo, ba klei bi hgŭm kluôm Việt Nam – Thái Lan đĭ kyar ƀrư̆ êlam hĭn, klă sĭt hĭn leh anăn tŭ dưn, đru mguôp jăk kơ klei êđăp ênang, hơĭt kjăp, bi hgŭm leh anăn mđĭ kyar ti krĭng wăl.