Khua knŭk kna Phạm Minh Chính mrâo ba mdah asăp mtrŭn mrô 176 mñă brei mjêč mgaih msir boh jhat mơ̆ng angĭn êbŭ mrô 10 leh anăn hjan hlĭm êa lêč. Truh kơ yang hruê dơ̆ng hruê 29/9, angĭn êbŭ ngă leh kơ 11 čô djiê, 13 čô luč, 8 čô luč klei blŭ hrăm, 33 čô êka, lu pưk sang, anôk mkra mjing jhat rai kjham.

Khua knŭk kna Phạm Minh Chính mơĭt klei bi juh hŏng dŭm gŏ sang phung mâo klei truh leh anăn mñă kơ khua bruă sang čư̆ êa dŭm čar, ƀuôn prŏng djŏ tuôm ngă mjêč bruă tui duah đru dŏng, đru kơ dŭm gŏ sang phung mâo klei truh tơl, dŏng mdrao amâo mâo mă prăk phung êka, mprăl krŭ wĭt bruă mkŏ mkra msĕ si êlan klong, pui kmlă, êa jua, dăng kông. Khua knŭk kna Phạm Minh Chính mñă kơ Phŭn bruă lĭng kahan, kahan ksiêm leh anăn dŭm êpul bruă tiŏ nao phung ngă bruă, rơ̆ng kơ klei êđăp ênang. Dŭm phŭn, dhar bruă, alŭ wăl srăng hưn mdah boh tŭ bi mdrơ̆ng kơ Khua knŭk kna êlâo kơ 3 mmông tlam grăp hruê čiăng hmao mgaih msir dŭm boh klei bluh mâo. Aguah 29/9, ti Nghệ An, k’iăng Khua knŭk kna Trần Hồng Hà mâo leh mmông kƀĭn online hŏng dŭm alŭ wăl gĭt gai bruă mgaih msir boh jhat angĭn êbŭ. Hluê si klei hưn, angĭn êbŭ srăng ngă truh klei hjan prŏng ti alŭ wăl Thanh Hóa – Hà Tĩnh, krĭng dap mnai krĭng Dưr, phú Thọ. Ară anei dŭm hnoh krông ti 3 čar Thanh Hóa, Hà Tĩnh leh anăn Nghệ An đĭ ti hnơ̆ng brei răng tal 3, kyuanăn alŭ wăl čiăng kñăm bi mdrơ̆ng hŏng klei êa lip lêč.