Mmăt mbruê 29/9, ti anôk bruă knŭk kna, ƀri bi hdơr 50 thŭn mkŏ mjing klei mjĕ giăm plah wah dua ala čar (1975–2025), Khua knŭk kna Phạm Minh Chính mâo leh klei blŭ hrăm êlan đĭng blŭ hŏng Khua knŭk kna Alemang Friedrich Merz bi trông kơ dŭm hdră êlan mtrŭt mđĭ klei bi hgŭm hdră êlan Việt Nam – Alemang đĭ kyar ƀrư̆ klă klơ̆ng, tŭ dưn leh anăn kluôm dhuôm.

Hlăm klei blŭ hrăm, Khua knŭk kna Phạm Minh Chính mñă kơ Alemang lŏ dơ̆ng bi mguôp hluê ngă tŭ dưn klei kuôl kă mnia mblei êngiê Việt Nam – EU (EVFTA), hnưm bi klă klei kuôl kă rơ̆ng kơ duh bi liê Việt Nam - EU (EVIPA), mkŏ mjing klei găl kơ dŭm knơ̆ng bruă dua ala čar pŏk mlar klei bi mguôp duh bi liê mnia mblei, ba klei kreh knhâo mrâo mrang leh anăn mlih mrâo bruă jing sa kmeh gơ̆ng mrâo hlăm klei bi mguôp dua tĭng. Dua tĭng bi tŭ ư hnưm mđĭ hnơ̆ng klei mjĕ giăm di hnơ̆ng dlông hĭn, lŏ dơ̆ng bi trông êpul gưl dlông, bi lar boh tŭ dưn dŭm hdră bi mguôp ară anei, lŏ dơ̆ng bi trông êpul gưl dlông, bi lar boh tŭ dưn hdră bi mguôp dôk mâo, mtrŭt mđĭ mkŏ mjing dŭm êpul bi mguôp mbĭt hlăm bruă duh mkra, kđi čar, mnuih mă bruă.