Ti anôk mă bruă, Khua knŭk kna Phạm Minh Chính hmư̆ leh phung khua Phŭn bruă Lŏ hma lehanăn Wăl hdĭp mda, phung khua ƀuôn prŏng Huế lehanăn dŭm čar Quảng Trị, Hà Tĩnh, Nghệ An, Thanh Hóa… hưn hdră mdrơ̆ng hŏng angĭn êbŭ mrô 5.

Hŏng ai tiê “Gang mkhư̆ êlâo kơ bi kdơ̆ng”, Khua knŭk kna mtă brei mprăp kluôm ênŭm. Khua knŭk kna mñă, hdră mdrơ̆ng hŏng angĭn êbŭ mrô 5 brei mđing kơ klei hdĭp mnuih ƀuôn sang jing phŭn, jing êlâo hĭn. Khua knŭk kna mtă kơ dŭm gưl, dhar bruă lehanăn alŭ wăl mprăp mơ̆ng hruê anei, hŏng ai tiê đua klam mbĭt anăn mprăp ênŭm kơ hdră mdrơ̆ng. Anôk gĭt gai ala čar kơ hdră gang mkhư̆ sowil mkŏ mjing leh Anôk bruă gĭt gai ti Knơ̆ng bruă gĭt gai Kahan krĭng 4, anôk phŭn kăp kriê dlăng, bi hgŭm hŏng Phŭn bruă Lŏ hma lehanăn Wăl hdĭp mda mbĭt hŏng dŭm êpul djŏ tuôm./.