Hlăm ai êwa mbĭt hŏng lăn čar bi hdơr 80 thŭn hruê krŭ kdơ̆ng mlan 8 leh anăn hruê mkŏ mjing lăn čar 2/9, aguah mbruê 25/8, Phŭn bruă hdră bhiăn mkŏ mjing knăm bi hdơr 80 thŭn hruê knhuah gru dhar bruă hdră bhiăn Việt Nam (28/8) leh anăn klei kƀĭn bi lông ktưn khăp kơ lăn čar dhar bruă hdră bhiăn gưl tal 6. Čih yap dŭm boh tŭ dưn dưi mâo mơ̆ng dhar bruă hdră bhiăn hlăm 80 thŭn êgao, hlăm knăm Khua knŭk kna Phạm Minh Chính bi ala khua gĭt gai Đảng, knŭk kna mđup brei mêđai mă bruă mrô 1 kơ Phŭn bruă hdră bhiăn kyua boh tŭ dưn êdah êdi hlăm bruă hdră bhiăn, đru mkŏ mjing leh anăn răng mgang lăn čar Việt Nam, kyua mta kñăm mnuih ƀuôn sang mdrŏng, lăn čar ktang, êngiê, mtăp mđơr, mrâo mrang.

Hlăm wưng kơ anăp, Khua knŭk kna Phạm Minh Chính mñă kơ dhar bruă srăng kñăm ruh mgaih klei dleh dlan, kpăk gun kơ klei kiă kriê, hdră bhiăn, mkŏ mjing klei kdlưn hĭn hlăm klei iêo jak leh anăn yua tŭ dưn djăp ai dưi, mkŏ mjing boh kdrŭt kơ lăn čar mŭt hlăm ênuk mrâo. Khua knŭk kna Phạm Minh Chính đăo knang hŏng knhuah gru 80 thŭn dhar bruă hdră bhiăn, bruă hdră bhiăn hlăm wưng kơ anăp srăng lŏ dơ̆ng mâo klei đĭ kyar mrâo, đru ngă tŭ dưn bruă cách mạng mơ̆ng Đảng, mơ̆ng djuê ana Việt Nam.