Ti anôk bi kƀĭn trông čhai bruă duh mkra êngao knŭk kna Việt Nam 2025, tlam mbrue  (16/09) ti Hà Nội mkŏ mjing leh klei trông čhai gưl dlông. Klei bi kƀĭn anei mâo giăm 1 êbâo čô phung khua kiă kriê mơ̆ng knŭk kna, dŭm phŭn dhar bruă, alŭ wăl lehanăn dŭm êpul êya bruă mơ̆ng ala tač êngao, phung truăn kơ bruă, phung kreh knhâo lehanăn phung duh mkra êngao knŭk kna hlăm kluôm ala.

Blŭ hrăm ti anôk trông čhai gưl dlông, Khua knŭk kna Phạm Minh Chính čang hmăng kơ phung duh mkra, hlue ngă kjăp hdră êlan mơ̆ng Đảng, Knŭk kna, mâo knhuah duh mkra ênuah, lehanăn klei thâo uêñ hŏng yang ƀuôn, mđrăm hŏng Đảng, Knŭk kna lehanăn mnuih ƀuôn sang hlue djŏ hdră êlan hnŭk êngiê djuê ana, yang ƀuôn ngă phŭn. Kơ bruă čuăn klă mngač, Khua knŭk kna mtă hlue ngă tŭ jing dŭm hdră mtrŭn klei bi kƀĭn prŏng mrô   13, jih jang hdră mtrŭn mơ̆ng bruă kđi čar, mrâo mtrŭn, hlăm anăn ba yua kdrăp mrâo, mlih mrâo hŏng klei knhêč kñăm bi kjăp, mđĭ kyar ai ktang klei mđĭ kyar mrâo./.