Dua čô khua kiă kriê bi êdah klei mơak kơ dŭm klei đĭ kyar hlăm klei bi mguôp dua ala čar, lŏ dơ̆ng mtrŭn agha êlam hĭn hlăm klei bi hgŭm kluôm dhuôm, anăp truh kơ klei mkŏ mjing yang ƀuôn thâo bi đru kơ mgi dih Việt Nam – Trung Quốc.

Khua lăn čar Lương Cường čang hmăng lŏ mđĭ hĭn klei bi mjĕ êrô gưl dlông, mtrŭt klei bi hgŭm kjăp hlăm bruă kreh knhâo kdrăp mrâo, mlih mrâo hŏng klei knhêč, mjuăt bi hriăm mnuih mă bruă hŏng klei kjăp, mkŏ êlan klông knơ̆ng, hgŭm duh mkra mnia mblei, bruă sang hră mơar lehanăn bruă hiu čhưn ênguê. Tập Cận Bình mñă bi pral mkŏ mjing klei bi kƀĭn tal 1 mơ̆ng dhar bruă hgŭm êlan êdeh treng, lehanăn mtrŭt bruă bi mjĕ êrô gưl dlông, bi êmuh hriăm hlăm bruă mkŏ mjing Đảng, kiă kriê lăn čar. Dua nah ăt bi tŭ ư hlue ngă dŭm bruă hlăm thŭn bi mjĕ êrô hlăm klei khăp bi hdơr 75 thŭn hrue mkŏ mjing klei mjĕ mgiăm./.