Tlam hruê 10/9 ti Adŭ bruă Khua lăn čar, Khua lăn čar Lương Cường mbĭt hŏng Mô̆ ñu gĭt gai leh Knăm drông Khua mâo klei dưi kluôm Australia Sam Mostyn lehanăn mô̆ ñu mâo gưl hiu čhưn ti Việt Nam. Leh knăm drông, Khua lăn čar Lương Cường bi trông leh hŏng Khua mâo klei dưi kluôm mơ̆ng Australia Sam Mostyn.  Dua tĭng lač, bruă mkra mđĭ jing Klei bi mjĕ jing ƀĭng hgŭm phŭn kluôm dhuôm mlan 3/2024 jing sa knhuang nao hƀuê ênuk, ba klei bi mjĕ dua nah đĭ kyar kjăp.

Dua ala čar jing ƀĭng hgŭm bruă mnia mblei prŏng mơ̆ng hdơ̆ng găp hŏng ênoh prăk bi mnia mblei mâo êbeh 14 êklai USD hlăm thŭn 2024, ênoh tuê hiu čhưn ênguê dua tĭng đĭ hlăm grăp thŭn. Dŭm anôk bruă duh mkra mơ̆ng Australia hlăk lehanăn dôk mjing klei găl čiăng mđĭ kyar bruă duh bi liê mnia mblei ti Việt Nam. Việt Nam dôk jing kdrông mkŏ čiăng Australia mđĭ hdră bi hgŭm hŏng krĭng Ngŏ Dhŭng Asi, đru mtrŭt mđĭ Klei bi mjĕ ƀĭng hgŭm phŭn kluôm dhuôm Australia – ASEAN lehanăn klei bi hgŭm klă sĭt plah wah Australia lehanăn krĭng krông Mê-Công. Khua mâo klei dưi kluôm mơ̆ng Australia bi mni klei đru mguôp yuôm bhăn mơ̆ng êpul êya hlăm brô 350 êbâo čô mnuih Việt Nam ti Australia, giăm 40.000 sinh viên Việt Nam dôk ksiêm hriăm ti Australia; mñă klei bi mjĕ mjuk mnuih ƀuôn sang jing tur knơ̆ng kjăp kơ klei bi mjĕ dua nah. Dua tĭng tŭ ư pŏk ngă kjăp hĭn dŭm hdră msir kñăm mđĭ hĭn bruă duh mkra dua nah, mđing truh kơ mta kñăm bi mnia mblei 20 êklai USD lehanăn mđĭ hĭn hdră duh bi liê dua nah hlăm dŭm thŭn ti anăp. Australia lŏ dơ̆ng bi hgŭm kjăp, sa ai hŏng klei bhiăn mơ̆ng Việt Nam lehanăn ASEAN hlăm hdră rơ̆ng kjăp klei êđăp ênang, klei êngiê êlan êa ksĭ, êlan phiơr ti krĭng ksĭ Ngŏ; msir mghaih klei bi kuan hŏng hdră msir êđăp ênang, mpŭ kơ hdră bhiăn tar rŏng lăn./.