Tlam mbruê 3/9, ti Bắc Kinh, China, mjưh ruê̆ klei bi tuôm dua tĭng, Khua lăn čar Lương Cường bi tuôm leh hŏng Khua mil čhil Russia Vladimir Putin. Khua lăn čar Lương Cường mñă klă dlăng yuôm klei mjĕ giăm hŏng Russia, sa ai hŏng Russia mđĭ kyar hơĭt kjăp leh anăn bi lar bruă klam hlăm tar rŏng lăn, mprăp mtrŭt mđĭ klei bi mguôp Russia – ASEAN.

 Khua lăn čar Lương Cường mñă ktang Việt Nam bi mni kơ knơ̆ng bruă Russia duh bi liê hlăm dŭm anôk bruă tuh tia, bi mguôp mkra mjing êa drao, kdrăp mrô… Dua čô khua gĭt gai bi tŭ ư bi kjăp hŏng klei mjĕ giăm bruă kđi čar – bruă hŏng tač êngao, hluê ngă tŭ dưn dŭm klei kuôl kă dưi mâo hlăm gưl hriê čuă mơ̆ng Khua mil čhil Putin ti Việt Nam hlăk mlan 6/2024 leh anăn gưl nao čuă Russia mơ̆ng Khua gĭt gai Đảng Tô Lâm hlăk mlan 5/2025, mbĭt anăn mđĭ hĭn klei bi trông êpul gưl dlông. Dua tĭng mñă  klei gĭr mđĭ hĭm klei bi mguôp bruă duh mkra – mnia mblei, duh bi liê, năng hŏng klei mjĕ giăm jăk siam leh anăn klei găl mơ̆ng grăp lăn čar.