Hlăm mmông drông, Khua lăn čar bi mklă Việt Nam dlăng myuôm klei mkra mđĭ klei bi hgŭm hŏng Turki kyua klei tŭ dưn mơ̆ng mnuih ƀuôn sang dua ala čar, ăt msĕ mơh klei êđăp ênang, hơĭt kjăp, bi hgŭm leh anăn mđĭ kyar ti grăp krĭng wăl leh anăn dlông rŏng lăn.

Khua lăn čar Lương Cường mñă klă klei bi hgŭm dua nah hlăm wưng êgao đĭ kyar jăk siam leh anăn Việt Nam čang hmăng ba klei bi hgŭm dua ala čar đĭ ti hnơ̆ng mrâo. Čiăng ba klei bi hgŭm bruă lĭng kahan Việt Nam - Turki bi hgŭm klă sĭt, tŭ dưn hĭn, Khua lăn čar mtă hlăm wưng kơ anăp Phŭn bruă lĭng kahan dua ala čar lŏ dơ̆ng mđĭ, bi êlam hĭn klei bi hgŭm hlăm tur knơ̆ng klei kuôl kă kơ bruă bi hgŭm bruă lĭng kahan dưi siñê, ăt msĕ mơh dŭm boh phŭn dưi bi trông, bi tŭ ư hlăm klei bi trông plah wah dua  Khua phŭn bruă lĭng kahan.