Blŭ hrăm hlăm knăm pŏk thŭn hriăm, Khua lăn čar Lương Cường mñă klă, sang hră jing gru mngač kơ ksiêm duah klei kreh knhâo, đru kčĕ hdră êlan, mđĭ kyar klei hlăk mblang, mđĭ ai dưi gĭt gai leh anăn kiă kriê bruă lĭng kahan, klei êđăp ênang mơ̆ng Đảng, knŭk kna, đru mkŏ mjing êpul lĭng kahan, bi kjăp bruă răng mgang lăn čar mơ̆ng hnưm, mơ̆ng kbưi, krơ̆ng kjăp klei hơĭt bruă kđi čar yang ƀuôn, mkŏ mjing tur knơ̆ng kjăp kơ bruă mkŏ mjing leh anăn răng mgang lăn čar.

Čiăng dưi ngă jăk bruă klam hlăm wưng mrâo mơ̆ng sang hră lĭng kahan, Khua lăn čar mñă kơ sang hră  čiăng lŏ dơ̆ng čŏng pô, hluê ngă tŭ dưn dŭm hdră êlan mơ̆ng Đảng, klei bhiăn lăn čar kơ bruă lĭng kahan, klei êđăp ênang, bi kơ bruă klam mkŏ mjing êpul knuă druh gưl dlông mơ̆ng Đảng, knŭk kna, êpul lĭng kahan, mbĭt anăn čŏng pô hyuă kjăp, hluê ngă hdră mtrŭn Klei kƀĭn kluôm bruă Đảng lĭng kahan gưl tal 7 leh anăn hdră mtrŭn klei kƀĭn Kluôm tal 14 mơ̆ng Đảng hlăm bruă hriăm mjuăt čiăng mkŏ mjing klei kdlưn hĭn kơ mta phŭn, hdră êlan mtô mjuăt, nao mbĭt hŏng klei hlăk mblang hlăm boh sĭt, găl guôp hŏng hdră êlan răng mgang lăn čar hlăm boh klei mrâo.