Blŭ hrăm ti anôk bi kƀĭn prŏng anei, Khua lăn čar  Lương Cường mtă kơ čar Phú Thọ brei mâo nanao klei thâo bi mguôp, bi sa ai prŏng kơ klei thâo săng lehanăn hdră mă bruă. Lŏ dơ̆ng mđing kiă kriê lehanăn gĭt gai bruă mkŏ mjing, ƀư̆ mkra Đảng lehanăn jih jang bruă kđi čar klă sĭt jing doh mngač kjăp ktang kơ bruă kđi čar, kơ klei mĭn lehanăn kơ knhuah hdĭp.

Khua lăn čar đăo knang, bruă Đảng, bruă sang čư̆ êa, mnuih ƀuôn sang djăp djuê ana, lehanăn êpuil lĭng kahan yang ƀuôn čar  Phú Thọ lŏ mđĭ hĭn knhuah gru thâo khăp kơ lăn čar, mâo klei thâo bi mguôp, mâo ai tiê čŏng kpưn đĭ, kut kat hlue ngă bi tŭ jing hdră mtrŭn mơ̆ng klei bi kƀĭn prŏng bruă Đảng čar gưl tal sa, rŭ mdơ̆ng čar Phú Thọ knư̆ hrue knư̆ mdrŏng siam, kreh dhar, jăk yâo, năng hŏng lăn ala mơ̆ng mtao Hùng đưm, phŭn agha kơ djuê ana Việt Nam, đru mguôp mbĭt hŏng kluôm Đảng, jih jang mnuih ƀuôn sang lehanăn lĭng kahan hlue ngă tŭ jing 2 mta kñăm kơ hdră êlan kluôm 100 thŭn.