Bi hdơr 80 thŭn hrue kgŭ krŭ kdơ̆ng mlan 8, lehanăn hrue mkŏ mjing lăn čar 2/9, hlăm sang bi kƀĭn hŏng ala tač êngao, ti Hà Nội, Knơ̆ng gĭt gai bruă Mặt trận čar kwar gưl dlông Việt Nam kdrăm k’ah mkŏ mjing klei bi kƀĭn gưl dlông mơ̆ng phung khua kiă kriê Đảng, Knŭk kna hŏng phung bi ala mơ̆ng dŭm gưl mnuih ƀuôn sang.

Blŭ hrăm ti anôk bi tuôm, Khua lăn čar Lương Cường mñă ti gŭ klei kiă kriê mơ̆ng Đảng Cộng sản Việt Nam, bruă Mặt trận Tổ quốc Việt Nam păn kjăp nanao jing kmeh gơ̆ng phŭn hlăn bruă kđi čar, jing boh sang bi klin, klei thâo bi mguôp jih jang yang ƀuôn, djăp djuê ana, klei đăo, mnuih Việt Nam hlăm ala čar lehanăn ti ala tač êngao, mjing leh ai ktang kơ klei bi mguôp jih jang djuê ana. Khua lăn čar mtă kơ bruă Mặt trận čar kwar Việt Nam dŭm gưl čŏng mđĭ hĭn bruă klam, klei mĭn jih jang, lehanăn mơ̆ng grăp čô jing phung kdlưn hĭn hlăm mnuih ƀuôn sang, mnuih djuê ƀiă, dŭm klei đăo, êpul phung duh mkra lehanăn mnuih Việt Nam ti ala tač êngao, đru hlăm klei mjuăt bi hriăm knhuah gru cách mạng kdrăm k'ah kơ djuê ana hlăm ênuk mrâo mrang./.