Khua lăn čar Lương Cường leh anăn mô̆ ñu hŏng êpul bi ala gưl dlông Việt Nam mjưh ruĕ jăk siam gưl nao mă bruă gưl dlông hlăm klei bi kƀĭn prŏng Êpul hgŭm lu ala čar gưl 80, bi hgŭm bruă ngă dua nah ti Mi, mơ̆ng hruê 21-24/9. Hlăm jar klei mă bruă, Khua lăn čar mâo leh klei blŭ yuôm bhăn hlăm Klei bi trông gưl dlông mơ̆ng Klei bi kƀĭn prŏng Êpul hgŭm lu ala čar gưl 80 leh anăn Klei bi kƀĭn gưl dlông kluôm tar rŏng lăn kơ bruă ngă hŏng Yan adiê. Mbĭt anăn, Khua lăn čar mâo leh klei bi tuôm dua nah hŏng khua gĭt gai dŭm êpul bruă lu ala čar leh anăn khua gĭt gai lu ala čar. Khua lăn čar bi mklă Việt Nam gĭr jih ai tiê leh anăn hrăm mbĭt hŏng jih jang dŭm ala čar čiăng klam bruă, găn klei lông dlăng, mđĭ bi mlih ktang čiăng mjing sa dlông rŏng lăn êđăp ênang, hơĭt kjăp, mđĭ kyar mdrŏng sah leh anăn kjăp, ba klei jăk mơak kơ mnuih ƀuôn sang.

Gưl nao mă bruă mơ̆ng Khua lăn čar  tŭ jing jăk siam hlăm jih jang bruă lu tĭng leh anăn dua nah, ba klei jăk siam kơ bruă klam, kơhưm, đru mguôp jăk, klă sĭt mơ̆ng Việt Nam hlăm klei msir mgaih bruă kluôm rŏng lăn ăt msĕ mơh mđĭ klei bi hgŭm Việt Nam hŏng Mi, klei bi hgŭm  Việt Nam hŏng dŭm ala čar kñăm đru mguôp kơ klei êđăp ênang, mđĭ kyar ti krĭng wăl leh anăn dlông rŏng lăn.