Aguah hruê 16/9, Phŭn bruă kđi čar, Anôk dlăng bruă Đảng mkŏ mjing leh Klei bi kƀĭn kluôm ala hyuă kjăp lehanăn pŏk ngă 4 Hdră mtrŭn yuôm bhăn mâo: Hdră mtrŭn mrô 59 kơ bruă ñŭ kma hŏng tar rŏng lăn; Hdră mtrŭn mrô 70 kơ bruă êđăp ênang pui kmlă; Hdră mtrŭn mrô 71 kơ hdră mđĭ kyar bruă sang hră mơar – mtô bi hriăm lehanăn Hdră mtrŭn mrô 72 kơ bruă răng mgang, mkra mđĭ klei suaih pral mơ̆ng mnuih ƀuôn sang.

Blŭ hrăm gĭt gai knăm anei, Khua gĭt gai Đảng Tô Lâm mñă leh klei yuôm bhăn mơ̆ng klei bi kƀĭn lehanăn mñă dŭm Hdră mtrŭn anei jing klei lŏ čuê lehanăn thiăm mbŏ kjăp ktang kơ “Hdruôm Pă Hdră mtrŭn” phŭn. Khua gĭt gai Đảng Tô Lâm mtă brei mđing mkŏ mjing Anôk gĭt gai gưl dlông hŏng grăp Hdră mtrŭn amâo dah Anôk gĭt gai Gưl dlông kơ bruă pŏk ngă dŭm Hdră mtrŭn mơ̆ng Phŭn bruă kđi čar. Khua gĭt gai Đảng mtă kơ dŭm Phŭn, dhar bruă, grăp alŭ wăl, knuă druh, phung đảng viên hluê ngă hŏng ai tiê “Blŭ nao mbĭt hŏng ngă”, khua anôk bruă tŭ đua klam kơ boh tŭ, amâo dêč kơ bruă./.