Blŭ hrăm gĭt gai ti Klei bi kƀĭn, Khua gĭt gai Đảng Tô Lâm, Khua bruă Đảng kahan gưl dlông hưn mdah 6 boh tŭ êdah êdi mâo bruă Đảng lĭng kahan dưi mâo hlăm wưng păn bruă êgao, hlăm anăn mâo bruă hluê ngă mđrăm mbĭt 6 êpul hdră msir mkŏ mjing êpul kahan kjăp ktang kơ knhuah kđi čar dưi bi mklă hlăm Hdră mtrŭn Klei bi kƀĭn bruă Đảng lĭng kahan tal XI, bruă Đảng kahan gưl dlông gĭt gai brei thiăm mbŏ lu hdră msir, djŏ guôp, mkkăp djŏ hŏng klei čiăng đĭ kyar hlăm boh klei mrâo.

Boh nik, knuă druh, lĭng kahan jing êpul phŭn, ba akŏ hlăm hdră gang mkhư̆ klei truh mơ̆ng yan adiê ngă, klei ruă tưp, tui duah, đru dŏng mnuih mâo klei truh, amâo uêñ klei dleh dlan, săn asei, mprăp nao ti dŭm krĭng huĭ hyưt, răng mgang ngăn drăp, klei hdĭp mnuih ƀuôn sang hlăm ala čar lehanăn ala tač êngao. Khua gĭt gai Đảng myă, brei mtrŭt mđĭ hdră mkŏ mjing êpul kahan cách mạng, thâo, knhâo, mrâo mrang. Hlăm anăn, “cách mạng, thâo, knhâo, mrâo mrang” dưi mđing mđĭ kyar nanao hlăm êbeh 80 thŭn mkŏ mjing, đĭ kyar lehanăn kdơ̆ng mblah mơ̆ng êpul kahan, khă snăn brei lŏ dơ̆ng mtrŭt mđĭ hĭn hlăm wưng mrâo./.