Aguah anei, 5/9, ti Anôk bruă bi kƀĭn ala čar (Hà Nội), Phŭn bruă Sang hră mơar - mtô bi hriăm mkŏ mjing leh Knăm bi hdơr 80 thŭn Hruê knhuah anôk bruă Sang hră mơar - mtô bi hriăm lehanăn mphŭn pŏk thŭn hriăm mrâo 2025 - 2026. Anei jing gưl tal êlâo, giăm 30 êklăk čô hđeh hriăm hră, sinh viên mbĭt hŏng 1,7 êklăk čô nai mtô hlăm kluôm ala nao ti knăm mphŭn pŏk thŭn hriăm mrâo mbĭt, mkŏ online, kkuh hla čhiăm gru lehanăn mmuñ Klei mmuñ Ala čar.

 Nao ti knăm anei, mâo Khua gĭt gai Đảng Tô Lâm, Khua lăn čar Lương Cường, Khua knŭk kna Phạm Minh Chính, Khua anôk bruă kƀĭn ala Trần Thanh Mẫn mbĭt hŏng phung khua kiă kriê Đảng, Knŭk kna, bi ala dŭm phŭn, dhar bruă lehanăn dŭm êpul bruă ala tač êngao ti Việt Nam. Thŭn hriăm 2025 - 2026 dưi bi mklă jing thŭn tal êlâo pŏk ngă dŭm hdră mtrŭn yuôm bhăn mơ̆ng Đảng lehanăn Anôk bruă kƀĭn ala, hlăm anăn mâo Hdră mjuăt bi hriăm phung hđeh điêt mơ̆ng 3 – 5thŭn.

Hdră bhiăn phung nai mtô lehanăn hdră mtrŭn đru prăk tăk hriăm hră.Anôk bruă mtô bi hriăm bi mklă leh mta phŭn thŭn hriăm 2025 – 2026  jing “Kjăp – Mĭn mrâo – Mjing boh kdrŭt -Mđĭ kyar” hŏng 10 bruă klam, hdră msir phŭn kñăm hluê ngă tŭ dưn dŭm hdră êlan mtrŭn mơ̆ng Đảng, Knŭk kna kơ bruă mtô bi hriăm, hluê ngă tŭ dưn mta kñăm mâo kčah mtrŭn. Knăm bi hdơr 80 thŭn Hruê knhuah anôk bruă Sang hră mơar - mtô bi hriăm lehanăn mphŭn pŏk thŭn hriăm mrâo 2025 – 2026 amâo djŏ knŏng bi hdơr kơ knhuah gru, čih yap dŭm klei đru mguôp mơ̆ng anôk bruă hŏng hdră cách mạng mơ̆ng Đảng lehanăn ala čar ƀiădah lŏ jing wưng krŭ wĭt ai tiê đua klam mơ̆ng kluôm anôk bruă lehanăn kluôm ala ƀuôn anăp klei čiăng đĭ kyar mơ̆ng ala čar hlăm ênuk gưl mrâo./.