Dlăng hră ti knăm anăn, Khua gĭt gai Đảng Tô Lâm lač, hlăm 80 thŭn leh êgao, hlăm klei dleh dlan, ƀiădah mâo lu klei bi knăl jhŏng ktang, bi klă kơ klei sĭt: Ti gŭ hla čhiăm gru mơ̆ng Đảng, lehanăn kơhưm mơ̆ng khua gĭt gai Hồ Chí Minh, nao mbĭt hŏng ai ktang mơ̆ng klei thâo bi mguôp jih jang mnuih ƀuôn sang, jih jang klei dlah dlan klei lông dlăng dưi găn jih.

Leh ênŭm klei Khua gĭt gai Đảng Tô Lâm blŭ, mnăm mkŏ mjing mtam klei ruĕ kahan, klei ruĕ bi hdơr 80 thŭn kgŭ krŭ kdơ̆ng mlan 8 tŭ jing hrue (19/8), lehanăn hrue mkŏ mjing lăn čar yang ƀuôn ngă phŭn êngiê Việt Nam 2/9 mâo truh 30.000 čô mnuih hlăm anăn mâo djăp êpul kahan, mbĭt hŏng mnuih ƀuôn sang ruĕ, lŏ mâo mbĭt êpul kahan dŭm ala čar China, Russia, Lào, Campuchia. Knăm bi hdơr anei lŏ sa blư̆ dơ̆ng bi mklă ai tiê klei kgŭ krŭ kdơ̆ng mlan 8, lehanăn hrue mkŏ mjing lăn čar yang ƀuôn ngă phŭn êngiê Việt Nam dôk kjăp nanao, bŏ hŏng klei mơak, mtrŭt jih jang mnuih ƀuôn sang Việt Nam mâo nanao ai tiê jhŏng ktang, êpa mhao kơ klei hnŭk êngiê – êđăp ênang – jăk mơak mơ̆ng aê ama pô, lŏ ksul mbŭ ai tiê klei mĭn mlih mrâo prŏng, kut kat rŭ mdơ̆ng sa Việt Nam đĭ kyar kluôm dhuôm, kjăp hlăm ênuk gưl mrâo mơ̆ng djuê ana Việt Nam.