Hruê mphŭn mkŏ mjing thŭn hriăm mrâo, 25 čô hđeh hriăm hră adŭ 1A, Sang hră gưl sa lehanăn gưl dua Nguyễn Văn Trỗi, să Ia Mơ, čar  Gia Lai hơ̆k mơak čŭt hơô čhum ao mrâo. Amâo mâo klei huĭ msĕ si hruê tal êlâo, kyua mơ̆ng knhal jih mlan 8, phung adei mâo leh nai mtô Hà Thị Hậu drông nao sang hră čiăng bi mưng hŏng sang hră, adŭ hriăm. Mơ̆ng bruă bi hơĭt anôk dôk, ksiêm dlăng hră mơar, mnơ̆ng yua hriăm hră truh kơ kdrăp čŭt hơô, phung hđeh ƀrư̆ ƀrư̆ mŭt hlăm wăl anôk hriăm mrâo. Hŏng phung hđeh krĭng taih kbưi, amai Hậu lŏ gĭr nao truh ti sang čiăng mđĭ ai nao sang hră. Nai mtô Hà Thị Hậu brei thâo:

 “Tinei, naimtô kơ phung hđeh hriăm kkuh, knhuah êbat dôk kdơ̆ng, klei bhiăn adŭ hriăm, dŭm klei bi knăl, klei kuôl kă. Si tô hmô, nai ktrâo kơ rup wĭl jing brei phung hđeh kuăl kngan dlăng ti jhưng jŭ, mbĭt anăn mtă kơ phung amĭ ama blei hdruôm hră, mprăp kdrăp čŭt hơô kơ anak… Mŭt adŭ 1, phung hđeh lu ka mưng ôh”.

Hlăk phung hđeh hơ̆k kdơ̆k nao sang hră, phung nai lehanăn amĭ ama ti Sang hră gưl sa lehanăn gưl dua Nguyễn Văn Trỗi mprăp leh djăp ênŭm klei jăk găl kơ phung hđeh mŭt hlăm thŭn hriăm mrâo. Amai Phạm Thị Hương- amĭ ama hđeh ti ƀuôn Klăh, să Ia Mơ, čar Gia Lai brei thâo:

 “Kâo mprăp leh hdruôm hră, giê čih, čhum ao, bi hơĭt klei mĭn leh wưng mdei sui hruê, lŏ mlih mmông, knhuah dôk dơ̆ng, mdei čiăng kơ jih jang phung anak lŏ mâo klei thâo săng êlâo kơ mŭt thŭn hriăm mrâo; tlŏ mgang kñăm gang mkhư̆ klei ruă”.

Ti să plao ksĭ Nhơn Châu, Sang hră gưl sa lehanăn gưl dua Nhơn Châu thŭn anei drông 207 čô hđeh hriăm hră, mâo 9 adŭ hriăm. Nai Hồ Thị Lại – Kơiăng khua Sang hră brei thâo, sang hră mâo 19 čô knuă druh, nai mtô, mnuih mă bruă. Anôk bruă nah gŭ mkăp ênŭm kơ hdrămtô bi hriăm, ƀiădah klei hdĭp phung nai mtô ti krĭng plao ksĭ ăt dôk dleh dlan, klei êrô êbat boh nik hlăm yan hjan êa lip dleh êdi. Čiăng mđĭ ai, sang hră mkăp leh anôk dôk, đru kơ phung nai hơĭt ai tiê dôk mă bruă. Êlâo anăn, sang hră lŏ bi hgŭm hŏng dŭm êpul bruă yang ƀuôn, đru hdruôm hră, hră čih kơ phung hđeh, đru dul klei ktrŏ kơ phung amĭ ama krĭng să plao ksĭ.

 “Hŏng klei găl mâo ti să plao ksĭ ăt dôk dleh dlan, hdruôm hră mrâo blei ăt lu prăk kăk mợh. Amĭ ama dleh dlan lu mơh. Thâo klei anei, sang hră iêu mtrŭt leh klei đru mơ̆ng yang ƀuôn. Ară anei, mâo mtrŭt leh klei đru mkăp brei hdruôm hră mrâo kơ phung hđeh mơ̆ng adŭ 6 truh kơ adŭ 9 lehanăn hră čih djăp ênŭm kơphung hđeh mŭt hlăm thŭn hriăm mrâo.

Phạm Văn Nam – Khua knơ̆ng bruă Sang hră mơar lehanăn mtô bi hriăm čar Gia Lai brei thâo, leh bi mŭt mbĭt, kluôm čar ară anei mâo 1.396 anôk bruă mtô bi hriăm hŏng êbeh 33 êbâo čô nai mtô. Khădah snăn, mŭt hlăm thŭn hriăm mrâo 2025-2026, anôk bruă ăt dôk kƀah truh 3.532 čô nai mtô lehanăn mnuih mă bruă mkă hŏng ênoh čuăn. Amâo djŏ kƀah mnuih mă bruă, anôk bruă nah gŭ ti lu anôk, boh nik ti krĭng knông lăn, plao ksĭ, ăt dôk kƀah lu.

Mrâo anei, knơ̆ng bruă Sang hră mơar lehanăn mtô bi hriăm čar nao ksiêm dlăng leh ti 7 să knông lăn nah Yŭ lehanăn ba mdah gru hmô sang hră čiêm rông mnuih djuê ƀiă mlir gưl hŏng ênoh duh bi liê êbeh 1.200 êklai prăk.

Dŭm hdră bruă srăng dưi mkăp ênŭm lehanăn bi knar mơ̆ng adŭ hriăm, anôk dôk, anôk huă ƀơ̆ng, tač hlăp truh kơ anôk bruă mdrao mgŭn, mkăp kơ êbeh 9.400 čô hđeh, mkrah wah jing phung hđeh mnuih djuê ƀiă. Tĭng, dŭm hdră srăng dưi rŭ mdơ̆ng hlăm thŭn 2025 lehanăn mŭt ngă bruă hlăm thŭn 2026-2027. Anei jing klei găl yuôm bhăn đru mđĭ boh tŭ yuôm hdră mtô bi hriăm ti dŭm krĭng dleh dlan.

Čiăng pral mkăp kơ thŭn hriăm mrâo, knơ̆ng bruă Sang hră mơar lehanăn mtô bi hriăm čar Gia Lai mâo hdră kčah lŏ ruah bi ênŭm phung nai dôk kƀah, boh nik ti dŭm klei hriăm mrâo hluê Hdră mtô bi hriăm thŭn 2018.

 “Knơ̆ng bruă đru kčĕ kơ Anôk bruă sang čư̆ êa čar čih mkra hdră kčah lŏ ruah 1.428 čô nai mtô, mđing kơ bruă ruah phung nai mtô hluê hdră mtô bi hriăm thŭn 2018, hriăm jih sa hruê, hdră mtô bi hriăm kơ phung hđeh mơ̆ng 3 – 5 thŭn, čih mkra hdră kčạh bi mlih, mkŏ dăp phung nai dôk mtô bi sang hră êbeh mnuih mtô ba nao mtô ti sang hră kƀah mnuih mtô, bi hrŏ klei êbeh – kƀah ti dŭm krĭng, dŭm alŭ wăl”.

Hŏng klei hgŭm mbĭt mơ̆ng sang hră, bruă knŭk kna lehanăn phung amĭ ama, phung hđeh ti krĭng knông lăn, plao ksĭ ti Gia Lai khădah dôk dleh dlan ƀiădah ăt kjăp ai tiê mŭt hlăm thŭn hriăm mrâo hŏng klei hơ̆k mơak kluôm ênŭm./.