Ti ƀuôn hgŭm Khánh Sơn, krĭng čư̆ čhiăng nah yŭ Khánh Hòa, kbưi hŏng krah čar êbeh 120km, jing alŭ wăl prŏng, ƀuôn sang rai rưng. Êlâo dih, bruă ksiêm dlăng bruă knuă hlăm nah gŭ tuôm hŏng lu klei dleh dlan. Ară anei, grăp aguah mơ̆ng phung knuă druh kčưm pŏk computer pô, pŏk  phần mềm hnơ̆ng mkă klei tŭ dưn bruă knuă  - KPI. Hlăm pomcputer êdah mtam klei čih kơ dŭm bruă čuăn: Drông mnuih ƀuôn sang, ngă hră mơar, mghaih msir bruă knuă hŏng klei pral. Truh jih hrue amâo mâo guôn lŏ mâo mnuih mtă mtăn ôh, grăp čô mnuih čŏng dlăng wĭt ya bruă dưi ngă leh, čih pioh hĕ mta bruă lŏ tuôm mrâo ka dưi mghaih msir.

Mơ̆ng phần mềm anăn yơh jing pô kăp ksiêm, đru phung khua kiă kriê păn kjăp jih jang bruă, khădah hŏng alŭ wăl jing taih kbưi, lehanăn mjing klei mjuăt mưng hŏng knuă druh čŏng pô bi mă bruă yơh.  Nguyễn Thị Hà, pô truăn mơ̆ng anôk bruă mkŏ mjing Đảng ƀuôn hgŭm Khánh Sơn, lač, anei jing klei bi mưng mrâo, mâo mkŏ mjing mơ̆ng mlan 4/2025, leh čar ba yua áp KPI kơ grăp anôk mă bruă, lehanăn hdră mă bruă mrâo, đru leh ñu čŏng ngă jih bruă pô:

 “Ba yua KPI hmei ƀuh klei mă bruă jing mtăp mđơr, klei kơ bruă knuă amâo srăng lĕ hlăm klei êmưt ôh. Hmei srăng thâo pô dưm bruă dưi ngă, dŭm mta bruă hră mơar, bruă kiă kriê… mbĭt anăn mkă hnơ̆ng klei dleh, lu amâodah ƀiă hŏng mnuih mă bruă, tui si bruă klam. Mkă tĭng klă mngač hĭn klei tŭ mơ̆ng bruă knuă pô ngă čiăng bi djŏ hŏng klei khua kiă kriê brei puăng.”

Kdrăp KPI mơ̆ng čar Khánh Hòa mâo mkŏ mjing kjăp khuăt dưi ba yua hlăm êpul mă bruă mơ̆ng mnuih mă bruă hlŏng kơ phung khua kiă kriê. Amâo mâo djŏ knŏng ti gưl ƀuôn hgŭm, lu anôk bruă kăp kčĕ lehanăn êpul êya bruă mơ̆ng čar ăt ba yua KPI. Nguyễn Minh Tuấn, K’iăng khua klam bruă Anôk mđĭ kyar lăn ala hlăm čar bi mklă,  KPI mâo đru leh êpul êya mkă tĭng hnơ̆ng klei mă bruă, mjing knơ̆ng kơ bruă ngăn prăk kơ êpul êya bruă čŏng thâo kiă kriê bruă ngăn prăk:

Tơdah amâo mâo dưi ksiêm dlăng jih ôh, snăn knuă druh mâo klei hâo mdah lač mâo ngă lu bruă, ƀiădah boh tŭ dưn amâo mâo lu ôh. Hrue mă bruă lehanăn prăk mlan jing dleh dưi kiă kriê, bruă knuă ngă nanao, klei tla prăk mlan kơ mnuih mă bruă knư̆ jing dleh hĭn kơ anôk bruă pô.”

Kñăm mđĭ hĭn klei tŭ mơ̆ng bruă mkă hnơ̆ng knuă druh mă bruă mơ̆ng KPI, čar Khánh Hoà mkŏ mjing leh êpul ngă bruă KPI, iêo jak phung knuă druh mâo klei thâo, ngă bruă anei hlăm grăp hrue kăm. Khua bruă Đảng čar Khánh Hoà - Nghiêm Xuân Thành kiă kriê dŭm klei bi kƀĭn, ksiêm wĭt mă klei hriăm. Boh sĭt leh êbeh 5 mlan ba yua brei ƀuh KPI đru mbha bruă hŏng klei klă mngač, mâo wăt klei čoh čuăn mmông ngă bruă, lehanăn hnơ̆ng dleh bruă knuă mă. Mă bruă pral, djŏ wưng kčah klei bi klin puăng; êmưt amâo bi leh wưng kčah, tĭng ƀiă puăng. Thị Thu Hương, K’iăng khua anôk bruă kiă kriê klei duh mkra lehanăn alŭ wăl tuh tia, jing mnuih dôk hlăm êpul KPI, brei thâo:

 “Mmông dôk mă bruă srăng tĭng hŏng ênoh čuăn bruă knuă jao, mâo mbĭt hŏng wưng dôk ngă bruă anăn čiăng bi leh. Leh pral srăng dưi lŏ mđĭ puăng, mklăk hŏng anăn dah êmưt srăng bi hrŏ puăng. Hnơ̆ng ênoh bi tĭng jing dleh kơ bruă knuă dưi mkă tĭng hlue jar kruak yap mơ̆ng mrô 1 kơ dlông. Mơ̆ng anăn, puăng mơ̆ng KPI mơ̆ng grăp čô knuă druh srăng dưi bi klin hlue mlan, 3 mlan sa blư̆, thŭn, tui hlue mta kñăm ba yua mơ̆ng khua kiă kriê”.

Mơ̆ng tal êlâo dôk bi hyưt kyua “bi mŭt lu mta ênoh” lu phung knuă druh ti  Khánh Hòa dơ̆ng yap KPI msĕ si “msĕ si asăr êa drao mbŏ klei jăk hlăm grăp hrue” đru kơ khua kiă kriê păn kjăp bruă knuă hĭn. Phạm Quốc Hoàn, Khua knơ̆ng kiă kriê anôk bruă kreh knhâo lač, mâo KPI, phung khua kiă kriê ênưih ƀuh ti anôk jăk, ti anôk awăt mơ̆ng grăp čô mnuih mă bruă.

 “Jih jang hlăm kdrăp  e- Office ară anei mâo mkŏ bruă kiă kriê hlăm KPI, snăn klei čih dŭm mta bruă ngă mơ̆ng grăp čô knuă druh tui si bruă knuă jao. Boh tŭ dưn mơ̆ng bruă knuă, mâo čih pioh hlăm phần mềm. Amâo mâo jing klei dleh dlan ôh êjai klei mă bruă.”

Klei klă mngač mơ̆ng KPI tĭng mkă đru leh kơ knuă druh, mnuih mă bruă mâo bruă klam hĭn, phung khua kiă kriê găl ênưih hĭn mơh mâo dŭm hdră mtrŭn hlăm klei kiă kriê bruă knuă. Êlâo dih, klei kreh mưn pia jing “Bi leh jăk bruă kčah jao” knŏng blŭ mă ti kƀông mbah đuič. Bi ară anei, grăp čô mnuih srăng êdah ti jar puăng mdê mdê, ênoh mmông mă bruă, lehanăn hnơ̆ng ênoh mâo čih pioh ênŭm djŏ wưng kčah klă mngač hlăm klei djŏ, mâo bi êdah klă.

Mơ̆ng Khánh Hòa, klei mlih mrâo nao djŏ hdră êlan mơ̆ng gưl dlông. Krah mlan  7, Anôk bruă kiă kriê hdră êlan mơ̆ng gưl dlông mâo mtrŭn leh jar KPI, pŏk êlan kơ klei ba yua hlăm djăp anôk kơ bruă kiă kriê bi tŭ jing jih jang bruă kđi čar, dưn yua mơ̆ng hrue 1/1/2026. Trần Lưu Quang, Khua bruă Đảng ƀuôn prŏng Hồ Chí Minh êjai mă bruă hŏng čar Khánh Hòa lač:

 “Anei jing hdră mă bruă amâo mâo djŏ djăp alŭ wăl mâo leh. Diih ngă leh bruă hŏng klei jăk, dưi mjing ênoh čuăn klă mngač snăn. Êlâo dih, drei knŏng kreh bi tĭng mkă tui si klei mĭn drei pô, hŏng boh pia tĭng mă snăn, msĕ si lŏ mđĭ, mđĭ hĭn. Ƀiădah tal anei bi kut kat mlih mrâo, mkă tĭng ênoh bruă dưi ngă hŏng ênoh klă sĭt hlăm klei ksiêm hnơ̆ng bruă mâo ngă, čiăng bi tĭng hŏng grăp čô knuă druh. Êpul khua kiă kriê čar  mâo leh klei bi tŭ ư klă mngač, knŏng bi mâo klei bi sa ai, sĭt nik bruă anei srăng lar truh kơ gưl nah gŭ hlăm dŭm boh ƀuôn hgŭm, mâo ngă snăn drei srăng ba wĭt klei tŭ dưn prŏng”./.