­Êpul ksiêm dlăng mbha jing 2 êpul, klă anăp nao ksiêm dlăng ti 8 ƀuôn hgŭm mâo: Xuân Lãnh, Sông Cầu, Phú Yên, Tuy An Nam, Krông Hnang, Krông Pač, Ea Kar leh anăn Ƀuôn Ama Thuôt. Ti dŭm alŭ wăl, êpul srăng hmưi klei hưn mdah, bi trông hŏng phung khua gĭt gai gưl bruă Đảng nah gŭ, bruă sang čư̆ êa , dhar bruă mặt trận, dŭm êpul, dhar bruă djŏ tuôm kơ boh sĭt hluê ngă bruă klam mđĭ kyar bruă duh mkra ala ƀuôn, bruă mlih mrâo klei ngă hră mơar knŭk kna, klei mlih mrô leh anăn klei ngă bruă mơ̆ng bruă sang čư̆ êa leh bi mŭt mbĭt hluê si gru hmô dua gưl. Boh sĭt ti dŭm alŭ wăl brei ƀuh, êngao kơ dŭm klei bi mlih mrâo jăk, klei bi hmô bruă sang čư̆ êa alŭ wăl dua gưl ăt bluh mrâo lu klei dleh dlan.

Ênoh bruă đĭ lu leh bi mŭt mbĭt êjai mnuih mă bruă ka dưi hmao tiŏ nao, lu mta bruă msĕ si hưn mthâo mrâo mrang, ngă prăk, yap prăk adôk kƀah knuă druh thơ̆ng kơ bruă, ngă truh klei êgao hnơ̆ng. mbĭt hŏng anănm bruă mkŏ mkra, kdrăp yua, anôk bruă ka mâo djăp hŏng klei čiăng, bruă mkŏ mkra hưn mthâo mrâo mrang ka hơĭt kjăp, bruă mgaih msir hră mơar kơ lăn leh anăn đa đa hră mơar online adôk tuôm hŏng klei dleh kpăk… Êpul ksiêm dlăng srăng bi kƀĭn hưn mdah hŏng Dhar bruă gĭt gai Bruă Kƀĭn Ala čiăng mâo dŭm klei akâo kơ hdră êlan mgaih msir găl guôp.