Knăm bi  hdơr 80 thŭn Hruê kgŭ krŭ kdơ̆ng mlan 8 tŭ jing lehanăn Hruê mkŏ mjing ala čar, 2/9, mâo dŭm hdră phŭn: Mgrông pui kƀŏng djuê ana, Knăm kkuh hla čhiăm gru, Răk asăp hưn mthâo mơ̆ng phung khua kiă kriê Đảng, Knŭk kna, Mnah knong pŏk knăm mơak, êpul êdeh phiơr kkuh drông knăm mơak, trŭn ruê̆ kahan. Dŭm êpul trŭn ruê̆ kahan, ruê̆ êbat mâo giăm 16 êbâo čô knuă druh, lĭng kahan, kahan ksiêm mbĭt hŏng mnuih ƀuôn sang, dŭm djuê ana… Êpul êdeh lĭng kahan mâo lu kdrăp phao ktuang, răng mgang wăl adiê, êdeh sar, êdeh mdei… lehanăn lu kdrăp yua hlăm anôk bruă lĭng kahan. Lĭng kahan 4 ala čar Russia, China, Lao, Campuchia ăt tiŏ nao êpul hriê ti knăm trŭn ruê̆ kahan anei. Leh găn knưng, dŭm êpul trŭn ruê̆ kahan srăng nao trŭn ruê̆ ti dŭm ktuê êlan phŭn čiăng bi êdah klei bi mguôp mơ̆ng êpul kahan hŏng mnuih ƀuôn sang.

Ti wăl adiê Hà Nội, kahan êlan phiơr mkŏ mjing 9 êpul phiơr hŏng êbeh 30 êdeh phiơr dakwak, êdeh phiơr mdiăng mnơ̆ng, êdeh phiơr mjuăt bi hriăm kdơ̆ng mblah, êdeh phiơr mblah lehanăn êdeh phiơr mnah mplĕ, mkŏ mjing lu êpul phiơr hlăm Knăm bi hdơr. Ăt wưng anei, ti krĭng ksĭ Cam Ranh (Khánh Hòa), dŭm êpul kahan êa ăt mkŏ mjing knăm ruê̆ kahan ti êa ksĭ, lehanăn mđung rup mmông anăn mtam ti Wăl tač prŏng Ba Đình.

Hlăm wưng anei, dŭm hdră hdar kreh, kdŏ mmuñ dưi mkŏ mjing hlăm kluôm ala. Ti Hà Nội, knăm rang mdah 80 thŭn ktuê êlan Hnŭk êngiê, êđăp ênang, yâo mơak pŏk ƀăng amâo mă prăk mkăp kơ mnuih ƀuôn sang mơ̆ng hruê 28/8 - 5/9/2025, ti Anôk bruă rang mdah ala čar, Cổ Loa, Đông Anh, Hà Nội. Knăm anei mâo klei hgŭm mơ̆ng 34 čar, ƀuôn prŏng, 28 phŭn dhar bruă lehanăn dŭm anôk bruă duh mkra êdah êdi hlăm kluôm ala.

Knăm rang mdah hưn mthâo, mdah dŭm boh tŭ êdah êdi mơ̆ng Ala čar hlăm 80 thŭn mkŏ mjing lehanăn mđĭ kyar hlăm djăp mta ra bruă, Mbĭt anăn, hưn mthoâ dhar kreh Việt Nam hŏng knhuah dŭm êbâo thŭn hƀuê ênuk, klei lu jơr mơ̆ng dhar kreh 54 djuê ana, klei lu jơr ngăn dŏ čŏng mâo, mnơ̆ng jăk 3 krĭng kwar lehanăn hdră rŭ mdơng êdah êdi ênuk đưm lehanăn ară anei hlăm kluôm ala…

Sang mđung asăp blŭ Việt Nam nao hlăm hdră rang mdah hŏng wăl anôk “80 thŭn Sang mđung asăp blŭ Việt Nam hrăm mbĭt hŏng lăn čar”. Tinei, mnuih ƀuôn sang dưi nao dlăng wăl anôk “Lŏ wĭt hŏng mbĭt mmông yuôm bhăn”, dôk ti wăl tač prŏng Ba Đình 80 thŭn êlâo, hmư̆ Khua gĭt gai Hồ Chí Minh dôk ti knưng răk asăp hưn mthâo klei hnŭk êngiê, hlăm ai êwa mpŭ, tlao driâo hơ̆k mơak, ênai pah kngan mơ̆ng dŭm êbâo čô mnuih, ƀuăn srăng răng mgang ala čar. Knŏng dŭm hruê, “Mnĭt mmông yuôm bhăn lŏ wĭt anei, drông leh dŭm êbâo čô nao dlăng.

Ƀuôn prŏng phŭn Hà Nội mkŏ mjing leh Knăm kdŏ mmuñ Knăm bi  hdơr 80 thŭn Hruê kgŭ krŭ kdơ̆ng mlan 8 tŭ jing lehanăn Hruê mkŏ mjing ala čar, 2/9 ti 2 anôk hlăm Wăk dhar kreh Quần Ngựa lehanăn wăl tač prŏng Cách mạng Tháng Tám (anăp Sang kdŏ mmuñ prŏng). Ƀuôn prŏng ăt mkŏ mjing 6 ânôk mnah phao briêng mkăp kơ mnuih ƀuôn sang.

Ăt wưng anei, ƀuôn prŏng Hồ Chí Minh ăt mâo 4 anôk mnah phao briêng. Klei êdah êdi hlăm hdră anei ti ƀuôn prŏng anei jing hdră kdŏ mmuñ dưi mkŏ mjing ti 3 anôk: Êlan Nguyễn Huệ (Quận 1), mdah ti wăl tač mnga ƀuôn prŏng mrâo (ƀuôn hgŭm Bình Dương) lehanăn wăl tač prŏng Thùy Vân (ƀuôn hgŭm Vũng Tàu).

Ti krĭng Lăn dap kngư – Dhŭng kwar krah, dŭm hdră dhar kreh, kdŏ mmuñ, mjuăt ktang asei mlei, mnah phao briêng… ăt dưi mkŏ mjing ti dŭm alŭ wăl mkăp kơ mnuih ƀuôn âng. Êdah êdi jing knăm mơak: “Klei jăk siam liă lia – Êa ksĭ mtah kƀĭn mbĭt” ti čar Gia Lai; Hruê kăm dhar kreh  - hiu čhưn ênguê - mnơ̆ng ƀơ̆ng huă lehanăn hdră kdŏ mmuñ ti Dak Lak; Hdră rang mdah “Lâm Đồng- 50 thŭn hơ̆k mơak hluh lir, knăm rang mdah mnga siam ti Đà Lạt, Lâm Đồng; Hdră rang mdah 50 thŭn mtlaih êngiê Gia Lai – Kon Tum ti wăl tač prŏng Đại đoàn kết, Pleiku, čar Gia Lai; knăm rang mdah “Jăk siam êa mil bi mƀĭn mbĭt” mbĭt hŏng knăm rang mdah thơ̆ng kơ bruă kphê lehanăn mnơ̆ng OCOP ti Ƀuôn Ama Thuôt, čar Dak Lak.