Ti buôn Trăp, să Čư̆ Mgar, dŭm êlan điêt siam dưi luôm hŏng ana kyâo mtah, dŭm boh mbuôn mnga bi êdah klei siam ti gŭ klei mđiă mngač siam. Boh nik, jing rup hla čhiăm gru hrah mtŭ kñĭ mâo bi kđhĭt hlăm angĭn, lŏ bi msiam kơ ƀuôn, jiă knhuah klei pưng myưng kơ djuê ana. H’Hằng ÊBan, sa čô dôk mda asei hlăm ƀuôn Trăp lač:

 “Mâo jao bruă kă hla čhiăm gru hlăm kdrêč êlan hlăm ƀuôn, kâo ƀuh mơak snăk. Bruă kă hla čhiăm gru kâo lŏ thâo săng hĭn kơ knhuah gru cách mạng mơ̆ng djuê ana, kơ hƀuê ênuk Đảng lehanăn knư̆ hĭn mơh khăp kơ lăn čar..”

Êlan hlăm ƀuôn Trăp boh taih 1 km, kčưm mơ̆ng hrue Klei bi mguôp prŏng, leh kơ anăn lŏ dơ̆ng truh kơ klei bi kƀĭn prŏng Đảng. Khua ƀuôn Y - Suinh Buôn Yă lač:

“nao kă hla čhiăm gru, mnuih ƀuôn sang jih jang hơ̆k mơak sơăi. Grăp boh sang čŏng blei hla čhiăm gru, čŏng kă. Hla čhiăm gru Đảng snăn grăp čô jing đảng viên srăng kă, bi hla čhiăm gru lăn čar, snăn grăp boh sang kă sơăi, čiăng mpŭ mni kơ lăn čar.”

Mơ̆ng ƀuôn Trăp, klei bi hmô kă hla čhiăm gru lăn čar mâo lar hlăm djăp anôk. Să Čư̆ Mgar ară anei mâo 7 km êlan hla čhiăm gru, mâo dŭm kdrêč êlan phŭn, lehanăn jih 11 boh buôn. Hồ Thị Thanh Hải, K’iăng khua bruă Đảng să Čư̆ Mgar lač:

 “Ară anei jih jang hlăm 11 boh ƀuôn lŏ bi mkra wĭt, bi msiam êlan klông, lehanăn kă hla čhiăm gru lăn čar, hla čhiăm gru Đảng jing klei mrâo hlăm djăp kdrêč êlan. Mơ̆ng leh mâo klei bi kă hla čhiăm gru hlăm djăp kdrêč êlan hlăm ƀuôn, snăn ƀuh jăk siam hĭn, mơak hĭn hlăm dŭm bruă mkŏ mjing klei bi mguôp jih jang djuê ana, lehanăn răng mgang lăn čar’.

Ti alŭ Tiến Thịnh, să Quảng Tiến, kdriêk Čư̆ Mgar, grăp gŏ sang mâo kă sơăi hla čhiăm gru boh hnik hlăm dŭm hrue Tết Nguyên đán lehanăn hrue mkŏ mjing Đảng. Hŏng giăm 400 gŏ sang, alŭ Tiến Thịnh jing sa hlăm dŭm alŭ wăl ngă klei bi hmô tal êlâo kă hla čhiăm gru. Nguyễn Tấn Chờ, khua alŭ Tiến Thịnh, lač:

 “Êjai hlăm sa boh alŭ ƀuôn mâo kă hla čhiăm gru snăn klei pưng myưng ƀuh êlan bŏ hŏng hla čhiăm gru, jing leh êlan mâo klei bi hmô tal êlâo hlăm kdriêk. Drei mpŭ jing hla čhiăm gru jing mpŭ kơ lăn čar, snăn pô kă hla čhiăm gru hŏng ai tiê mpŭ”.

Klei bi hmô êlan kă hla čhiăm gru ti alŭ Tiến Thịnh, să Quảng Tiến mâo ngă leh mơ̆ng thŭn 2016, leh kơ anăn pral leh lŏ bi lar truh kơ 6 alŭ hlăm să.  Nguyễn Thị Thanh Vân, k’iăng khua knơ̆ng bruă sang čư̆ êa să Quảng Tiến lač.

 “Êlâo dih grăp čô mnuih ƀuôn sang bi kă hla čhiăm gru, lehanăn mâo să lŏ mtrŭt mjhar mơh snăn jih ênŭm 6 hlăm boh alŭ mâo kă leh sơăi hla čhiăm gru hlăm êlan, lehanăn jih jang mnuih ƀuôn sang bi sa ai hlue ngă”.

Êlan klông kă hla čhiăm gru ti kdriêk Čư̆ Mgar bŏ hŏng klei myưng m’ang hŏng djuê ana, mtrŭt mđĭ klei thâo bi đru bi ktưn hlăm bruă duh ƀơ̆ng, bruă dhar kreh alŭ wăl. Nguyễn Thiên, K’iăng khua bruă Đảng kdriêk Čư̆ Mgar brei thâo:

 “Dŭm boh să, wăl krah mkŏ mjing êlan kă hla čhiăm gru mơ̆ng thŭn 2020. Tal êlâo jing hlăm dŭm êlan phŭn ti krah să, ară anei hlăm dŭm boh wăl krah mâo pŏk mlar truh leh hlăm dŭm boh ƀuôn. Mkŏ mjing êlan kă hla chiăm gru hlăm djăp ƀuôn êlan. Hlăm anăn lŏ mtrŭt mjhar sa ai hŏng klei bi kƀĭn prŏng Đảng djăp gưl, lehanăn lŏ jing klei găl hĭn hlăm bruă lŏ hâo hưn ƀri wưng bi hdơr mơ̆ng lăn čar”.

Dŭm kdrêč êlan bŏ hŏng hla čhiăm gru hrah mtŭ kñĭ đung bi kđhĭt hlăm angĭn yan mnga jing klei bi knăl kơ klei hdĭp bŏ hŏng klei jăk yâo kbiă hriê mơ̆ng klei mkŏ mkra krĭng ƀuôn sang mrâo ti kdriêk Čư̆ Mgar, čar Daklak knư̆ hrue knư̆ mdrŏng sah, kreh dhar./.