Anôk bruă sang čư̆ êa ƀuôn hgŭm Hòa Phú, čar DakLak mkŏ mjing leh adŭ mjuăt bi hriăm kơ êbeh 140 čô jing knuă druh lehanăn bi ala anôk bruă duh mkra ti alŭ wăl. Pô mtô jing phung thơ̆ng kơ bruă kdrăp mrâo, mnuih hriăm amâo djŏ dưi hưn mthâo kơ kdrăp AI ƀiădah lŏ dưi ktrâo lač ba yua AI hlăm klei msir mghaih bruă mă. Nguyễn Trung Hòa – Nai mtô ti Sang hră gưl krah Công thương kwaw Krah, pô mtam nao hgŭm hlăm hdră mtô bi hriăm brei thâo:

 “Klei mdê mơ̆ng adŭ hriăm anei mkă hŏng lu gưl mjuăt bi hriăm mkăn jing phung hriăm dưi ba yua mtam leh hriăm. Hmei amâo mtô hluê hdră hđăp, ƀiădah hmei đru kơ mnuih hriăm hdră thâo ba yua AI dưi mâo boh tŭ dưn. Grăp čô knuă druh, anôk bruă duh mkra dưi mkra kơ pô “Sa AI đru bruă”, đru msir mghaih bruă mă tŭ dưn hĭn.

Hluê si phung khua kiă kriê să Hoà Phú, dŭm hruê tal êlâo hluê ngă gru hmô bruă knŭk kna alŭ wăl 2 gưl, alŭ wăl tuôm hŏng lu klei dleh dlan hlăm bruă msir mghaih klei ngă hră mơar kơ mnuih ƀuôn sang lehanăn anôk bruă duh mkra. Lu jing kyua knuă druh kƀah klei thâo. Knuă druh jing mnuih hđăp ƀiădah bruă mrâo, grăp adŭ bruă knŏng mâo dŭm čô ƀiădah păn ngă lu bruă klam leh kah mbha gưl.

Mơ̆ng klei anei, phung khua să Hòa Phú bi mklă, ƀiă mnuih ƀiădah čiăng dưi ngă lu bruă brei thâo ba yua kdrăp mrô. Hlăm anăn, ba yua klei thâo anak mnuih AI jing sa hdră msir tŭ dưn. Să jak iêu leh phung thơ̆ng kơ bruă kdrăp mrô lehanăn AI wĭt mtô bi hriăm, hŏng ai tiê” Leh hriăm dưi ngă mtam”. Đỗ Xuân Hiếu – Kơiăng khua Anôk bruă sang čư̆ êa să Hòa Phú, čar Dak Lak brei thâo snei:

 “Leh mjuăt bi hriăm, hmei brei grăp čô knuă druh, mnuih mă bruă bi mâo “AI đru bruă”, mkăp kơ klei mă bruă mơ̆ng pô. Êlâo adih, sa hdră kčah čiăng sa hruê čih mkra, ară anei hŏng AI knŏng luič mă 30 segong. Bruă adôk jing klei mĭn, bi bruă mă mâo leh AI đru.

Amâo djŏ knŏng ti să Hòa Phú, ti ƀuôn hgŭm Tân An, čar Dak Lak, bruă ba yua kdrăp mrâo AI hlăm klei msir mghaih bruă ngă hră mơar mđĭ lar leh boh tŭ dưn. Amai Văn Thị Anh Đài – pô thơ̆ng kơ bruă ngă hră mơar ti ƀuôn hgŭm Tân An brei thâo:

 “Ba yua kdrăp mrâo AI mjing leh klei găl wăt kơ phung knuă druh thơ̆ng kơ bruă lehanăn mnuih ƀuôn sang. Hŏng phung knuă druh, hmei ênưih ksiêm dlăng klei dưi, bi mklă hră mơar čiăng msir mghaih ti gưl să. Hŏng mnuih ƀuôn sang, AI ăt đru ksiêm dlăng lehanăn thâo ya mta hră mơar dưi ngă ti ƀuôn hgŭm mtam, mơ̆ng anăn mkiêt mkriêm hruê mmông lehanăn mjing klei jăk găl hlăm klei ngă hră mơar.

Boh sĭt brei ƀuh, klei ba yua AI lehanăn kdrăp mrô amâo djŏ knŏng bi hrŏ klei ktrŏ kơ êpul knuă druh, mnuih mă bruă ƀiădah lŏ mđing kơ klei sa ai, klei jăk găl kơ mnuih ƀuôn sang lehanăn anôk bruă duh mkra tơdah hluê ngă hră mơar.

 “Hruê anei, gŏ sang kâo nao ngă hră lăn lehanăn hră mơar mkăn. Tal êlâo ka thâo bĭt klông êlan mơh ƀiădah leh mâo knuă druh ktrâo lač, pral mơh kâo ngă leh. Leh ngă, kâo mâo bi kčah hruê hlăm đĭng blŭ hŏng hruê ba wĭt hră mơar, jăk găl kâo ƀuh.

Čiăng kơ bruă ba yua kdrăp mrâo mŭt hlăm boh sĭt, klei hrăm mbĭt mơ̆ng dŭm anôk bruă duh mkra  hâo hưn êlan kbưi jing yuôm bhăn. Hlăm wưng êgao, dŭm anôk bruă duh mkra hâo hưn êlan kbưi hgŭm mbĭt hŏng bruă knŭk kna alŭ wăl hluê ngă bruă klam anei. Êdah êdi jing Viettel Dak Lak bi hgŭm hŏng bruă knŭk kna alŭ wăl pŏk lu hdră msir mrâo, mkăp tŭ dưn kơ hdră ngă bruă knŭk kna 2 gưl. Nguyễn Thanh Bình – kơiăng khua anôk bruă Viettel Dak Lak brei thâo:

 “Hmei mkăp leh hdră msir đru kơ bruă kơ phung knuă druh, mnuih mă bruă, mđing kơ 2 êbâo mta bruă djŏ tuôm kơ 23 hdră mtrŭn mrâo kơ klei kah mbha gưl, kah mbha klei dưi mơ̆ng Knŭk kna. Kdrăp anei đru kơ phung knuă druh ngă djŏ bruă klam djŏ hŏng klei bhiăn, mbĭt anăn mđĭ boh tŭ hdră mă bruă.

Hŏng ai tiê “Hriăm hlŏng dưi ngă mtam”, dŭm adŭ mjuăt bi hriăm kơ kdrăp mrâo msĕ si ti să Hòa Phú amâo dah ƀuôn hgŭm Tân An mơ̆ng čar Dak Lak dôk pŏk êlan nao mrâo, đru kơ phung knuă druh ƀuôn hgŭm amâo djŏ knŏng mđĭ klei thâo kơ kdrăp mrô, ƀiădah lŏ bi mlih klei mĭn, pral ba yua kdrăp mrô čiăng mkăp kơ mnuih ƀuôn sang jăk hĭn hlăm wưng ti anăp. Anei ăt jing sa hdră ngă jăk čĭng kơ dŭm alŭ wăl ti čar pŏk ngă tŭ dưn Hdră mtrŭn mrô 57 mơ̆ng Phŭn bruă kđi čar kơ kdrăp mrâo – kreh knhâo lehanăn bi mlih mrâo./.