“Bi hdơr 100 thŭn hruê Hră klei mrâo Cách mạng Việt Nam leh anăn bi trông kơ klei bhiăn, hdră êlan, klei găl kơ bruă klei mrâo, mkŏ mjing êpul ngă bruă klei mrâo ngă djŏ klei čiăng mđĭ kyar hlăm wưng mrâo” jing akŏ klei bi trông kyua Knơ̆ng bruă dhar kreh, mjuăt asei mlei leh anăn hiu čhưn ênguê Dak Lak, Êpul ngă bruă klei mrâo čar, Anôk bruă hâo hưn mtô mblang leh anăn čung ba mnuih ƀuôn sang bruă Đảng čar Dak Lak bi hgŭm mkŏ mjing tlam (17/6). Hlăm klei bi trông, phung bi ala lač kơ klei lông dlăng hlăm wưng mrâo, kčĕ hdră msir mkŏ mjing êpul ngă bruă klei mrâo ngă djŏ klei čiăng đĭ kyar.

Hlue si pô čih klei mrâo Đàm Thuần, K’iăng Khua lŏ wĭt dlăng Hră klei mrâo Dak Lak, mtă brei ƀrư̆ mđĭ kơ klei mlih mrô leh anăn hnơ̆ng jăk klei hâo hưn, phung ngă bruă klei mrâo brei krơ̆ng kjăp knhuah cách mạng, klei mă bruă. Mbĭt anăn, brei thơ̆ng, păn kjăp anôk pô klam bruă, brei jing phung ƀuôn sang mrô, phung čih klei mrâo mrô. Phung bi ala ăt bi tŭ ư, hŏng alŭ wăl msĕ si Dak Lak, bruă mkăp klei hâo hưn djŏ klă, hmao, čiăng êdi truh hŏng mnuih ƀuôn sang, boh nik mnuih ƀuôn sang krĭng taih kbưi, krĭng mnuih djuê ƀiă, amâo djŏ jing bruă klam yuôm bhăn ôh ƀiădah lŏ jing bruă kđi čar, knuih hdĭp phung ngă bruă klei mrâo.