Aguah hruê 2/7, ti anôk bruă knŭk kna ƀuôn hgŭm Tân Hà Lâm Hà, čar Lâm Đồng, dŭm pluh čô dôk guôn ngă hră mơar, lu hĭn jing nao ngă hră lăn. Phạm Duy Lâm, ti alŭ Đức Bình truh kơ êla anei thâo amâo lŏ mâo ôh gưl kdriêk, ngă hră lăn srăng ngă ti ƀuôn hgŭm. Mâo knuă druh mtô brei, ñu hơ̆k mơak leh anăn đăo knang hră mơar dưi ngă hnưm.

 “Hruê anei nao ngă hră ƀuh knuă druh mtô hur hrar êdi, bruă ka dưi ngă diñu ƀuăn hruê. Sơnăn ăt jăk êdi mơh, ăt hmăng hmưi klei ngă hră mơar khuăt.”

Ăt nao ngă hră lăn, aduôn Hoàng Thị Thanh Nhàn, ti ƀuôn B’Srê B, să Tà Đùng, čar Lâm Đồng ư ai hŏng klei mlih mrâo, thơ̆ng kơ bruă leh anăn hruê mă bruă mơ̆ng bruă sang čư̆ êa ƀuôn hgŭm mrâo. Ñu hmăng hmưi mnuih ƀuôn sang nao ngă hră mơar srăng bi myuôm hnơ̆ng  ngă bruă hlăm tur knơ̆ng mrô mơ̆ng bruă knŭk kna.

 “Čiăng hluê ngă hnưm, čiăng kơ mnuih ƀuôn sang wĭt lač, jăk amâodah amâo jăk, 5 mtŭ jing jăk, 4 mtŭ jing man dưn, sitôhmô sơnăn. Boh klei brei puăng ăt hluê si klei knuă druh đru kơ mnuih ƀuôn sang, tơdah jăk mnuih ƀuôn sang srăng wĭt lač jăk.”

Leh sa hruê kăm ngă klei bi mŭt mbĭt, bruă sang čư̆ êa gưl ƀuôn hgŭm ti Lâm Đồng dưi ngă bruă, mphŭn kčưm ăt brei ƀuh klei dleh dlan kơ bruă mkŏ mkra, kdrăp yua, boh nik ti dŭm anôk ngă hră mơar knŭk kna. Čiăng mgaih msir, khua gĭt gai dŭm alŭ wăl bi klă mă jih bruă amâo djŏ mă jih mmông, adôk mnuih ƀuôn sang adôk mă bruă. Nguyễn Minh Toàn, k’iăng khua bruă sang čư̆ êa hlŏng păn ngă Khua kiă kriê anôk bruă ngă hră mơar knŭk kna ƀuôn hgŭm Tân Hà Lâm Hà, čar Lâm Đồng brei thâo, hlăm dŭm hruê tal êlâo, să tŭ mă leh anăn mtô mgaih msir giăm 160 hră mơar. Mâo lu mta bruă hlăm klei dưi mơ̆ng gưl kdriêk hđăp. Ƀiădah hŏng klei mprăp klă nik leh anăn mlih mrâo hdră mă bruă, gưl ƀuôn hgŭm mrâo dưi ba mâo djăp klei čiăng kơ mnuih ƀuôn sang. Nguyễn Minh Toàn, mñă klă:

“Hmei bi klă êlâo, bruă knuă mrâo jih ktrŏ êdi, ară anei pătdah 100% bruă mơ̆ng kdriêk hđăp jao kơ să mrâo, kyuanăn hmei čŏng pô mơ̆ng êlâo, phung knuă druh jăk hĭn čiăng đru kơ mnuih ƀuôn sang. Hŏng ai tiê ngă bruă knŭk kna hmei srăng ba kơ mnuih ƀuôn sang klei ngă bruă jăk hĭn, dŭm hră mơar ênưih hĭn.”

Bi klă bruă klam phŭn jing đru kơ mnuih ƀuôn sang, ti lu ƀuôn hgŭm mơ̆ng čar Lâm Đồng dưi leh anăn dôk bi mlih hdră mă bruă. Lu hră mơar dưi ngă mtam. Mbĭt hŏng ngă hră mơar, mnuih ƀuôn sang, knơ̆ng bruă dưi ngă ti ƀuôn hgŭm anei amâodah ƀuôn hgŭm dih, kyuanăn lu ƀuôn hgŭm čŏng duah mnuih ƀuôn sang, knơ̆ng bruă leh anăn dlăng kơ digơ̆ jing mta phŭn mă bruă.

Hluê si Trần Nam Thuần, Khua bruă sang čư̆ êa să tà Đùng, čar Lâm Đồng, tơdah klei mă bruă amâo mâo jăk srăng ngă kơ mnuih ƀuôn sang nao ngă ti ƀuôn hgŭm mkăn, leh anăn să anăn diñu bi klă jing ka jăk ôh. Kyuanăn, bruă sang čư̆ êa ƀuôn hgŭm dôk hyuă kjăp čiăng ngă bruă hŏng klei đru, dlăng kơ mnuih ƀuôn sang, knơ̆ng bruă jing mta phŭn ngă bruă.

 “Klei bi mlih mrâo prŏng hĭn mơ̆ng bruă sang čư̆ êa 2 gưl jing knăm čiăng đru kơ mnuih ƀuôn sang leh anăn knơ̆ng bruă. Kčưm mơ̆ng năn hlăm dŭm hruê tal êlâo, bruă sang čư̆ êa să Tà Đùng bi kƀĭn, hyuă kjăp truh kơ jih jang phung knuă druh, phung mă bruă knŭk kna čiăng bi mlih klei mĭn, hdră mă bruă. Hluê si klei hâo hưn čiăng kơ mnuih ƀuôn sang thâo klă hră mơar knŭk kna anăn ăt jing klei đoh ktŭng mnuih ƀuôn sang čiăng mgaih msir hră mơar knŭk kna.”

Leh sa hruê kăm ngă bruă hluê si bruă sang čư̆ êa 2 gưl ti čar Lâm Đồng brei ƀuh klei dôk bi mlih jăk. Amâo mâo lŏ ngă bruă msĕ hdră hđăp, ƀiadwah mâo klei bi mlih hluê si mta kñăm, djŏ hdră mơ̆ng gưl dlông, anăn jing jĕ hŏng mnuih ƀuôn sang leh anăn đru kơ mnuih ƀuôn sang jăk hĭn./.