Y-Dhun H’Mŏk, khua mduôn ƀuôn Dur 1 ăt hdơr nanao hruê Khua gĭt gai Đảng Nguyễn Phú Trọng hriê hgŭm hlăm Hruê knăm bi mguôp dŭm djuê ana să Dur Kmăn, kdriêk Krông Ana, čar Dak Lak hlăk knhal jih thŭn 2018. Ñu myưng mơang dưi bi ala kơ mnuih ƀuôn sang hlăm ƀuôn mđup brei ao Êđê pơ̆k mñam kơ Khua gĭt gai Đảng. Y-Dhun H’Mŏk lŏ wĭt hdơr:

 “Awa lač: Mnuih ƀuôn sang srăng gĭr mă bruă knuă mđĭ kyar klei hdĭp, anak čô nao sang hră mơar. Ară anei mnuih ƀuôn sang mâo êsei huă, djam ƀơ̆ng, anak čô dưi nao sang hră, anăn jing klei mơak êdi. Ƀuôn sang mâo klei mlih. Mnuih ƀuôn sang lač jăk kơ Awa đru leh kơ mnuih ƀuôn sang ti ƀuôn Dur Kmăn”.

Bi Hmyet, khua ƀuôn Tiêng 2, să tân Sơn, ƀuôn prŏng Pleiku, čar Gia Lai, ăt dôk hdơr nanao rup jĕ giăm mơ̆ng Awa:

 “Thŭn 2011, awa Nguyễn Phú Trọng hriê čuă dua ƀuôn Jarai hmei ti să Ia Tiêm leh anăn să Ayun, kdriêk Čư̆ Sê. Mnuih ƀuôn sang ƀuh awa jĕ giăm leh anăn uêñ mĭn, awa jing khua gĭt gai kpă ênô gĭt gai leh Đảng drei bi kdơ̆ng hŏng klei ƀơ̆ng ngăn. Kâo leh anăn mnuih ƀuôn sang Jarai đăo knang kyua mâo Đảng, bruă duh mkra ala ƀuôn, klei hdĭp mnuih ƀuôn sang krĭng Lăn Dap Kngư srăng mâo klei mlih jăk hĭn”.

Bi êdah klei ênguôt hnĭng hŏng Khua gĭt gai Đảng Nguyễn Phú Trọng, Bon Yô Soan, pô mâo kơhưm ti ƀuôn prŏng Đà Lạt, čar Lâm Đồng, bi êdah klei đăo knang hlăm klei gĭt gai mkŏ mjing lăn čar mơ̆ng Đảng:

  “Bruă bi kdơ̆ng, gang mkhư̆ klei ƀơ̆ng ngăn, klei amâo mâo djŏ hŏng knuă druh đảng viên mâo Khua gĭt gai Đảng Nguyễn Phú Trọng ngă tuč hnơ̆ng amâo mâo anôk kăm ghă. Arăanei mnuih ƀuôn sang jing mnuih djuê biă ti čar Lâm Đồng hmư̆ leh anăn đăo knang hlăm klei gĭt gai mơ̆ng Đảng.”