Kkuh mơak 80 thŭn hruê mkŏ mjing ala čar 2/9, ti ƀuôn Chưp, să Lơ Pang, čar Gia Lai, mnuih ƀuôn sang Bahnar bi kă hla čhiăm gru, mkŏ mjing lu hdră yuôm bhăn bi êdah klei khăp kơ ƀuôn sang, ala čar. Anei jing wưng čiăng kơ mnuih ƀuôn sang lŏ dlăng wĭt ktuê êlan kdrưh kơăm mơ̆ng hƀuê ênuk djuê ana lehanăn mđing truh kơ êdei anăp jăk siam hĭn. Đinh Brơi, 67 thŭn, 44 thŭn Đảng, jing mduôn khua ƀuôn Chưp, să Lơ Pang, čar Gia Lai ktưn hưn brei thâo: 

“Hruê 2-9, hruê mkŏ mjing ala čar, jih jang mnuih ƀuôn sang lăn dap kngư hrăm mbĭt hŏng hruê mơak klei hnŭk êngiê mơ̆ng ala čar. Hlăk dôk điêt, koâ dưi ƀuh hdră yuôm bhăn anei, kyua anăn truh kơ đĭ prŏng, kâo gĭr hluê ngă knhuah mngač mơ̆ng pô jhŏng ktang Núp hlăk bi kdơ̆ng hŏng roh Prăng amâo mâo kdŭn, amâo mâo ngă hlŭn kơ phung roh. Kyua anăn kâo nao hriăm ngă kahan, đru mguôp ai pô tơdah lăn čar čiăng, hgŭm mguôp sa ai tiê hluê Đảng, Knŭk kna, truh thŭn 1975 dưi mâo klei hnŭk êngiê. Ară anei hdră duh mkra, ala ƀuôn đĭ kyar kâo hĭn mơh ktưn hưn kơ ala čar Việt Nam pô.

Khua mduôn K’ Keo, djuê ana K’Ho, giăm 70 thŭn, Khua bruă Đảng ƀuôn Hàng Làng, ƀuôn hgŭm Di Linh, čar Lâm Đồng brei thâo, hriăm lehanăn hlue ngă knhuah mngač Awa Hồ, jih 16 čô đảng viên hlăm êpul bruă Đảng ƀuôn mâo klei thâo bi hmô sơăi hlăm djăp mta bruă. Msĕ hŏgn asei khua mduôn pô, khădah thŭn leh khua, ƀiădah ăt gĭr ba yua klei kreh knhâo hlăm bruă pla mjing kphê, ngă lŏ… mâo ba wĭt leh boh mnga jăk. Lehanăn thâo kriê pioh knhuah gru dhar kreh djuê ana pô, mtrŭt mjhar mnuih ƀuôn sang mkŏ mjing klei hdĭp mrâo. Khua mduôn K’ Keo brei thâo: Jih jang phung đảng viên hlăm êpul bruă Đảng thâo săng kơ bruă klam pô mơ̆ng mnuih đảng viên, mâo nanao klei thâo ba anăp hlăm bruă mđĭ kyar klei hdĭp mda, hlue ngă jăk hdră êlan mơ̆ng Đảng, knŭk kna, mâo nanao klei thâo bi mguôp hlăm ƀuôn sang, hlăm anăn mâo lu phung đảng viên mda asei. Anei jing dŭm klei bi hmô mngač čiăng kơ mnuih ƀuôn sang tui hriăm knhuah mngač mơ̆ng Awa Hồ čiăng mơ̆ng anăn mơh mnuih ƀuôn sang mă mjing giê mkă. Čiăng kơ êpul bruă Đảng kjăp ktang, snăn jih jang phung đảng viên bi sa ai, thâo bi hmô jăk hlăm jih jang bruă, snăn kơh yap bi leh bruă jao hlăm grăp thŭn.

Mbĭt hŏng klei mĭn lehanăn bruă ngă mơ̆ng phung khua khua thâo bi hmô kơ phung mda asei, Liêng Hót Ha Kliêng (djuê ana K’Ho) mnuih mâo k’hưm hlăm ƀuôn Srê Đăng, ƀuôn hgŭm Tân Hội, čar Lâm Đồng, lač:  Tui hriăm mơ̆ng Awa anăn jing klei thâo khăp kơ lăn čar, hlue gưt hdră êlan mơ̆ng Đảng, knŭk kna. Tal dua lĕ, mnuih ƀuôn sang pô brei thâo kreh kriăng duh ƀơ̆ng, thâo mtô bi hriăm anak čô, boh nik phung hđeh êdam đăm lĕ hlăm klei soh čhuai ôh, đăm ngă soh hŏng klei bhiăn knŭk kna, ñĕ đuĕ mơ̆ng matuĭ, amâo mâo lĕ hlăm klei kpiê êsei. Brei thâo bi mguôp, amâo mâo duah tlĕ dăp, amâo mâo ngă klei bi rŭng hlăm ƀuôn sang, ngă luič klei bi mguôp plah wah dŭm djuê ana ayŏng adei, anăn yơh jing dŭm mta klei mnuih khua thŭn tui hriăm mơ̆ng Awa, lehanăn brei thâo ngă klei bi hmô hlăm ƀuôn sang.

Jing pô kdlưn hĭn, mrâo mâo leh bruă sang čư̆ êa ƀuôn hgŭm Đăk Tô, čar Quảng Ngãi bi mni êlâo kơ knăm 2/9, aduôn Y Xuân – djuê ana Xơ Đăng, Khua bruă Đảng, hlŏng klam jing khua ƀuôn Kon Hring, lač:‘’Kâo mtrŭt mjhar mnuih ƀuôn sang nanao hlăm bruă mkŏ mkra krĭng ƀuôn sang mrâo, bi mlih klei hdĭp mda, wăl sang bi bư̆ mnư̆ mnang, lehanăn doh siam, djiêo êlan klông bi pla mnga čiăng bi siam ƀuôn sang. Kâo mtrŭt mjhar mnuih ƀuôn sang bi mlih klei mĭn, hdră mă bruă, lui jih dŭm knhuah mưng amâo mâo jăk, bi mlih hdră duh ƀơ̆ng bi djŏ guôp hŏng lăn ala, mđĭ ênoh mâo hrui wĭt kơ gŏ sang. Hlăm ƀuôn ară anei, mâo leh klei bi mlih lu, boh nik phung hđeh mda asei thâo gĭr duh ƀơ̆ng, bi ktưn hlăm klei mă bruă , lu gŏ sang tloh blei leh êdeh p’phŭt, êdeh kai, êsŭng kwă kphê… păt dah grăp boh sang mâo mprăp leh djăp ênŭm pioh duh kơ bruă knuă mă lehanăn klei hdĭp”.

Tui hriăm lehanăn hlue ngă knhuah mngač mơ̆ng Hồ Chí Minh, mniê lehanăn êdam êra ƀuôn hgŭm Čuôr Dăng, čar Daklak hlăk lehanăn dôk bi lar ai tiê klei thâo bi đru hlăm ƀuôn sang. H’Xani Niê, djuê ana Êđê, jing k’iăng khua êpul hgŭm bruă mniê ƀuôn hgŭm Čuôr Dăng, lač:“Êpul hgŭm bruă mniê, lehanăn êpul êdam êra ƀuôn hgŭm  Čuôr Dăng mâo nanao klei thâo bi sda ai, tui ngă klei awa Hồ mtô hŏng hdră iêo mthưr jih jang ƀĭng hgŭm bi mâo hdră đru ƀuôn sang; sitôhmô gĭr đru dŭm gŏ sang dôk hlăm klei dleh dlan, nao čuă dŭm gŏ sang knŭk kna dlăng ba… êpul êdam êra ƀuôn hgŭm lehanăn êpul hgŭm bruă mniê mâo klei bi mguôp mbĭt  djă pioh knhuah gru dhar kreh djuê ana pô, msĕ si bruă pơ̆k mñam, hriăm klei kưt, eirei, hriăm tông čing.”

Luy (djuê ana Jarai) Khua bruă êdam êra să Ia Băng, čar Gia Lai, mơak yăl dliê klei blŭ mơ̆ng Awa Hồ: “Ya mta bruă ba wĭt klei tŭ dưn kơ mnuih ƀuôn sang, snăn brei ngă yơh hŏng jih ai tiê, ya mta bruă jing jhat kơ mnuih ƀuôn sang snăn bi ñĕ đuĕ”. Ñu brei thâo kơ jih bruă êdam êra alŭ wăl pô:“Bruă čuăn kơ hmei jing mđĭ hĭn klei hâo hưn, čiăng kơ phung êdam êra lehanăn mnuih ƀuôn sang thâo săng, mơ̆ng anăn hdĭp jăk, hdĭp djŏ hŏng klei awa Hô mtă. Êpul bruă êdam êra ƀuôn hgŭm jih ai tiê bi đru mnuih ƀuôn sang hlăm bruă ngă định danh hnơ̆ng ta 2 lehanăn mkŏ VNeID. Mơ̆ng anăn đru hlăm bruă ngă hră mơar jăk găl hĭn. Êpul bruă êdam êra ƀuôn hgŭm Ia Băng mâo bi mguôp leh hŏng lĭng kahan Quân đoàn 3 nao hlăm bruă bi mdoh, jah waih, hwai mnuôr mbông êa, lehanăn mkra wĭt êlan hlăm lŏ hma, đru kơ mnuih ƀuôn sang găn êrô jăk ênưih hlăm klei mă bruă”.

Thŭn anei 35 thŭn, ƀiădah A Định mâo leh 10 thŭn ngă khua bruă Đảng, hlŏng klam ngă khua ƀuôn Đăk Pung, ƀuôn hgŭm Ngọc Tụ, čar Quảng Ngãi. Hriăm lehanăn hlue ngă knhuah mngač Hồ Chí Minh, ñu mđĭ kyar leh klei hdĭp mda gŏ sang pô mơ̆ng bruă pla kphê, ksu, rông ŭn jŭ, rông mnŭ rông kan, lehanăn mtrŭt mjhar mnuih ƀuôn sang bi tui hlue. Klei thâo mbruă mơ̆ng ñu, đru leh kơ mnuih ƀuôn sang djuê ana Xơ đăng ti krĭng taih kbưi msưh kdŭn klei ư̆ êpa ƀun ƀin, ƀrư̆ ƀrư̆ rŭ mdơ̆ng klei hdĭp mrâo. Ñu mâo klei myun mâo Khua knŭk kna mđup brei hră bi mni. A Định brei thâo:‘Ya mta bruă jing dleh snăn pô yơh ngă êlâo, pô ngă klei bi hmô djŏ tui si klei khua gĭt gai Hồ Chí Minh mtă ‘’Đảng viên ngă klei bi hmô êlâo, mnuih ƀuôn sang tui tluôn êdei”, hlăm anăn pô yơh ktrâo atăt kơ mnuih ƀuôn sang hlăm klei duh ƀơ̆ng, mđĭ ênoh mâo hrui wĭt… Msĕ si ară anei mprăp kơ yan hrui êmiêt, kaoa mbĭt hŏng mnuih ƀuôn sang lŏ nao mkra wĭt êlan hlăm ƀuôn, čiăng kơ bi jăk bruă dŭ mdiăng boh mnga”.

Y’Săn, ti bon Dak Mâm, ƀuôn hgŭm Dak Săk, čar Lâm Đồng, brei thâo, êpul bruă êdam êra hlăm ƀon kreh mkŏ mjing klei bi mguôp, mtrŭt mjhar ngă dŭm bruă bi đru hlăm phung êdam êra, hdĭp mâo bruă klam hŏng găp djuê, hŏng ƀuôn sang. Boh nik, mđĭ hĭn ai tiê tui hriăm lehanăn hlue ngă knhuah mngač mơ̆ng Awa Hồ, čiăng kơ klei hdĭp knư̆ hrue knư̆ jăk siam hĭn. Y’Săn, lač: Hlăm gŏ sang, kâo mđing kơ klei duh ƀơ̆ng, dưn yua dŭm hdr\a êlan mă bruă mrâo dlăng kriê wiê ênăk kphê bi jăk, ngă lŏ bi mboh, đru kơ phung êdam êra dôk găn hlăm klei dleh dlan, čiăng bi hrăm mbĭt mđĭ kyar klei hdĭp mda. Ară anei ênuk mrô leh, asei kâo ăt tui hriăm mơh, čiăng thâo ƀuh lu klei mrâo hĭn tuii tiŏ bi hmao hlăm klei mlih mrâo”./.