Anei jing dŭm hdră bruă hlăm êlan klông, mdrao mgŭn, war mnga - anôk kriê pioh leh anăn dŭm hdră bruă êpul êya čiăng êdi. Dŭm hdră bruă mphŭn rŭ mdơ̆ng leh anăn ba yua amâo djŏ knŏng mđĭ hnơ̆ng jăk klei hdĭp mda kơ mnuih ƀuôn sang ôh ƀiădah lŏ đru bi leh anôk bruă nah gŭ, mjing boh kdrŭt iêô jak bi liê leh anăn mđĭ kyar hơĭt kjăp kơ krĭng hlăm dŭm thŭn kơ anăp.

Knăm phŭn mkŏ mjing ti Anôk bruă rang mdah mnơ̆ng dhơ̆ng ala čar (să Đông Anh, Hà Nội), mbĭt anăn mkŏ hŏng 79 anôk mđung rup hlăm lu hdră bruă hlăm kluôm ala. Klei bi kƀĭn hưn kơ klei gĭr, bruă klam leh anăn ai tiê sa ai mơ̆ng jih bruă kđi čar hlăm bruă ngă hdră kñăm đĭ kyar, lar bra ai tiê ktưn hưn, ai tiê bi hgŭm leh anăn gĭr mkŏ mjing sa Việt Nam ƀrư̆ mdrŏng sah. Hlăm knăm mphŭn ba yua Anôk bruă rang mdah mnơ̆ng dhơ̆ng ala čar, Khua gĭt gai Đảng Tô Lâm leh anăn Khua knŭk kna Phạm Minh Chính mđup brei leh Medai mă bruă mrô Sa,  gưl tlâo kơ êpul mâo leh  lu klei đru mguôp yuôm bhăn kơ klei mđĭ kyar bruă duh mkra ala ƀuôn mơ̆ng ƀuôn prŏng leh anăn lăn čar.

Ti Lăn Dap Kngư  - Dhŭng kwar Krah gưl anei mâo 14 hdră bruă mphŭn rŭ mdơ̆ng leh anăn ba yua, hlăm anăn mâo čar Gia Lai mâo 3 hdră bruă, Dak Lak mâo 3 hdră bruă, Khánh Hòa 4 hdră bruă, Lâm Đồng 4 hdră bruă./.