Tŭ klei iêo jak mơ̆ng Khua lăn čar Lương Cường leh anăn mô̆ ñu, Mtao Bhutan Jigme Khesar Namgyel Wangchuck leh anăn mô̆ gơ̆ truh leh ti Hà Nội kčưm gưl kriê čuă Việt Nam mơ̆ng hruê 18 – 22/8. Anei jing gưl hruê čuă truh ti Việt Nam tal êlâo mơ̆ng mtao Bhutan leh anăn mô̆ gơ̆ yap mơ̆ng dua ala čar mkŏ mjing klei mjĕ giăm hlăk thŭn 2012.Mơ̆ng hruê mkŏ mjing klei mjĕ giăm, Việt Nam dlăng yuôm bhăn klei mjĕ giăm hŏng Bhutan, dlăng kơ Bhutan jing sa hlăm dŭm ala čar nao êlâo hlăm bruă hluê ngă mta kñăm đĭ kyar mtah, krơ̆ng kjăp ênoh mrô yâo mơak.

Êjai anăn, Bhutan dlăng kơ Việt Nam jing sa hlăm dŭm ala čar mđing tal êlâo mtrŭt mđĭ klei mjĕ giăm dua tĭng ăt msĕ mơh mă klei hriăm đĭ kyar mơ̆ng Việt Nam. Hŏng tur knơ̆ng klei mjĕ giăm jăk siam leh anăn klei bi hgŭm, gưl hriê čuă mơ̆ng mtao Bhutan bi êdah klei dlăng yuôm mơ̆ng Bhutan hŏng klei mjĕ giăm leh anăn klei bi mguôp plah wah dua ala čar, ăt msĕ mơh bruă klam, kơhưm mơ̆ng Việt Nam ti alŭ wăl, mbĭt anăn bi êdah klei bi myuôm mơ̆ng Việt Nam hŏng Bhutan. Gưl hriê čuă kñăm ba klei mjĕ giăm dua ala čar mtrŭn agha êlam hĭn, tŭ dưn hĭn, mtrŭt mđĭ dŭm mta bruă mâo klei găl plah wah dua ala čar hlăm wưng kơ anăp.