Mdê hŏng asei mlei ti êngao điêt msĕ si hđeh sang hră gưl sa, asei mlei amâo jăk kluôm ênŭm, Chương Đình Phúc, (kkiêng thŭn 2005), dôk hriăm thŭn 2, adŭ hriăm klei Ăngle, Anôk hriăm klei blŭ ala tač êngao, Sang hră gưl prŏng Lăn Dap Kngư ba kơ phung mkăn klei jăk mơak kyua klei blŭ hrăm mđĭ ai leh anăn klei yăl dliê dưi găn jih klei dleh dlan hŏng klei ktưn hưn. Phúc mâo klei ruă bi hrut asei mlei mơ̆ng tian amĭ, klei suaih pral awăt, ênuk hđeh kƀah klei mơak kyua amĭ ama bi lui hlăk dôk điêt ngă kơ ñu pô mâo klei ñŭt huĭ. Hŏng klei phung riêng gah đru, Phúc dưi hŏng klei nŭt hŭi, klei gĭr ktưn hriăm hră leh anăn hgŭm hlăm dŭm hdră bruă, êpul hgŭm, jing sa čô êdah êdi hlăm lu bruă ngă ti sang hră gưl tlâo leh anăn gưl prŏng. Phúc ăt jing sa hlăm dua čô êdah êdi mda asei hlăm hdră “kuč mngač klei gĭr Việt” thŭn 2024.

 Chương Đình Phúc lač, 5 klei Awa Hồ mtô hriăm mơ̆ng điêt jing leh klei atăt êlan kơ ñu tui hriăm leh anăn gĭr grăp hruê. Wăt tơdah ya klei dleh dlan kơ asei mlei, ñu ăt čang hmăng jing sa čô gai hră thơ̆ng leh anăn jing sa čô nai dưi ba klei mđĭ ai kơ phung hđeh.

 “Kâo čang hmăng tơdah leh ruĕ hriăm snăn kâo ăt tui hriăm Awa Hồ, anăn jing tơdah pô hriăm leh ya klei snăn lŏ mtô kơ pô mkăn. Kâo čang hmăng srăng jing sa čô nai amâo djŏ knŏng mtô kơ hđeh klei thâo ôh ƀiădah lŏ jing anôk kơ phung mâo klei dleh dlan srăng knang, anôk hơĭt ai tiê čiăng mđĭ ai, čiăng amâo găn ôh ya klei dleh dlan anăn hjăn păn pô msĕ si kâo hlăk dôk điêt”.

Ăt hdơr kơ klei Awa mtă “ti anôk čiăng kơ phung êdam êra srăng mâo tinăn, ya bruă dleh dlan mâo phung êdam êra” ayŏng Trần Tiến (kkiêng 1992), pô ngă bruă hlăm adŭ bruă Kriê dlăng hră mơar, Hră ênua ala ƀuôn čar Dak Lak đru kčĕ, mkŏ mjing bruă ngă êdam êra mđing kơ dŭm alŭ wăl mdê hjăn hlăm čar. Ñu lu blư̆ mkŏ klei ngă bruă đru răng kriê, lar bra ênoh yuôm dhar kreh mnuih djuê ƀiă, msĕ si mkra, hwai mdoh pin êa, mđĭ klei thâo săng răng mgang wăl hdĭp mda kơ mnuih ƀuôn sang; mđup brei mnơ̆ng, đru prăk bi liê mtô tông čing kơ alŭ wăl krĭng knông lăn. Mbĭt anăn, ayŏng Tiến duah, mđĭ ktang bruă yua kdrăp mrô hlăm klei hlue ngă bruă klam thơ̆ng, mâo lu gru hmô mrâo, hdră ngă bruă čiăng đru kơ mnuih ƀuôn sang mkŏ dưm, ba yua kdrăp online, mjing klei găl hlăm bruă mnia blei leh anăn ba yua hdră bruă kơ klei hră ênua ala ƀuôn. Ayŏng Trần Tiến brei thâo:

 “Kâo jing đảng viên mda asei, ăt mâo bruă đảng mjing klei găl nanao rơ̆ng dŭm akŏ bi kƀĭn, mâo klei găl ksiêm hriăm êlam hĭn dŭm akŏ klă klơ̆ng mơ̆ng bruă tui hriăm leh anăn hlue ngă klei Awa mtă. Kâo gĭr ktưn jih ai tiê kyua bryă ngă mbĭt, hlăm bruă hlue ngă bruă klam thơ̆ng snăn kâo hriăm klei Awa mtă lu hĭn ti čar ai tiê, amâo mdei tui hriăm čiăng mđĭ klei thâo pô”.

Hŏng amai Nguyễn Thùy Trang, kkiêng thŭn 1992, Khua dlăng bruă Êdam êra  ƀuôn hgŭm Ea Tam, ƀuôn prŏng Ƀuôn Ama Thuôt, wăt tơdah  hlăm ti gưl thŭn, ya anôk bruă, ñu ăt thâo săng bruă klam phung knuă druh. 23 thŭn jing leh K’iăng Khua bruă mặt trận čar kwar ƀuôn hgŭm mda asei hĭn Dak Lak, amai Trang pral mkŏ tui hriăm leh anăn hlue ngă klei mĭn, knhuah hdĭp Hồ Chí Minh hlăm bruă thơ̆ng. Mơ̆ng leh bi mlih jing khua bruă êdam êra, ñu pŏk ngă mkŏ mjing 77 hdră bruă êdam êra, mkŏ mjing lu bruă đru kơ klei hdĭp mda ala ƀuôn, gĭr hgŭm hlăm bruă đru kơ phung êdam êra mŭt ngă kahan, đru kơ phung êdam êra mphŭn čô̆ kơ bruă, mkŏ êdam êra hgŭm hlăm hdră răng kriê leh anăn răng mgang klei dhar kreh dŭm djuê ana. Mơ̆ng anăn, mjing klei mkŏ, mđĭ lar bruă klam phung êdam êra ti nah gŭ. Amai Nguyễn Thùy Trang brei thâo:

 “Mơ̆ng klei mtrŭt mjhar ăt msĕ mơh  ksiêm hriăm kơ Awa snăn kâo pô hriăm mơ̆ng Awa kơ klei kriăng leh anăn gĭr, mđĭ bruă klam pô hlăm klei hlue ngă bruă mơ̆ng dŭm gưl jao. Kpă ênuah, hlue engă bi djŏ leh anăn hlue si klei bhiăn mơ̆ng êpul bruă čiăng mjing klei bi hgŭm giăm hĭn plah wah Đảng hŏng mnuih ƀuôn sang leh anăn hlăm phung knuă druh hŏng phung êdam êra.”

Hŏng dŭm bruă ngă klă klơ̆ng, djŏ guôp hŏng bruă klam leh anăn tui hriăm, phung mda asei čar Dak Lak “Hriăm leh anăn hlue ngă klei mngač knhuah hdĭp Hồ Chí Minh” hŏng klei mbruă. Phung êdah êdi hlăm klei mtrŭt mjhar anei mjing leh klei lar bra ktang snăk hlăm phung êdam êra, đru yuôm bhăn hlăm bruă bi leh bruă klam, tui hriăm hlăm dŭm anôk bruă, sang hră ti Dak Lak.