Gưl hriê čuă mkŏ mjing hlăm wưng dua ala čar mrâo mđĭ hnơ̆ng klei mjĕ giăm jing ƀĭng hgŭm hdră êlan kluôm dhuôm hlăk thŭn 2024. Gưl hriê čuă bi êdah hdră êlan dlăng yuôm leh anăn mđing tal êlâo kơ klei mđĭ kyar klei mjĕ giăm hŏng alŭ wăl Ngŏ Dhŭng Asi, hlăm anăn mâo Việt Nam.

Bi kơ Việt Nam, bruă tŭ drông pô bi ala ênŭm klei dưi Australia hriê čuă đru hluê ngă hdră êlan hŏng tač êngao mơ̆ng Đảng leh anăn knŭk kna dlăng yuôm bhăn klei mjĕ giăm hŏng dŭm ala čar Pacific, boh nik jing Australia. Ară anei, Australia jing ƀĭng hgŭm mnia mblei prŏng tal 7 mơ̆ng Việt Nam leh anăn jing ƀĭng hgŭm prŏng tal 10 mơ̆ng Australia. Hnơ̆ng klei mnia mblei dua tĭng đĭ kyar hơĭt kjăp, mâo êbeh 14 êklai dolar Mi hlăm thŭn 2024. Dua tĭng ăt hur har pŏk anôk mnia mblei kơ boh mnga hdơ̆ng pô. Gưl hriê čuă mơ̆ng pô mâo ênŭm klei dưi Australia Sam Mostyn srăng lŏ dơ̆ng bi kjăp leh anăn mđĭ klei đăo knang hdră êlan plah wah dua ala čar, đru mguôp kơ klei êđăp ênang, hơĭt kjăp leh anăn đĭ kyar alŭ wăl.