Rơ Lan Lết, ti ƀuôn Klăh, ƀuôn hgŭm Ia Mơ, čar Gia Lai mâo dua čô anak dôk hriăm aguah tlam ti sang hră gưl 1 leh anăn gưl dua Nguyễn Văn Trỗi. Grăp hruê, 4 blư̆ nao atăt leh anăn mă anak, mâo hruê nao mă bruă hma, phung anak lŏ čơ̆ng đĭ êdeh wai jơ̆ng wĭt huă yang hruê, jing suăi êmăn êdi.

Kyuanăn, leh hmư̆ ƀuôn hgŭm Ea Mơ dưi duh bi liê giăm 200 êklai prăk čiăng rŭ mdơ̆ng sang hră knŭk kna rông ba mlir gưl hriăm ti anôk prŏng 6ha ktuê êlan dơ̆ng 664, hŏng ênŭm adŭ hriăm, adŭ mdei, anôk huă yang hruê, sang huă ƀơ̆ng, tač hlăp lêñ mbĭt hŏng pui kmlă leh anăn êa jua leh anăn mâo bruă mdrao mgŭn hlăm sang hră, Lết amâodưi mdăp ôh klei hơ̆k mơak. Ñu đăo knang, leh mâo sang hră, anak ñu dưi mâo anôk dôk anôk huă ƀơ̆ng hơĭt ti sang hră, mbĭt anăn dưi hriăm hlăm anôk jăk êdi, mrâo mrang hĭn.

 “Lač kơ sang hră, êlâo dih mâo leh. Ƀiădah anăp anei, bruă sang čư̆ êa alŭ wăl gưl gưl rŭ mdơ̆ng sang hră knŭk kna rông ba anak čô pô, sang hră mrâo hơ̆k mơak êdi. Mnuih ƀuôn sang ăt hơ̆k mơak, jăk êdi leh”.

Amâo djŏ knŏng phung amĭ ama, phung nai ăt hơ̆k mơak. Ngô Văn Vững, k’iăng khua kiă kriê ti sang hră gưl 1 leh anăn gưl 2 Nguyễn Văn Trỗi, ƀuôn hgŭm Ea Mơ brei thâo, ti alŭ wăl mâo lu sang hră kbưi truh kơ 18km, ngă kơ phung hđeh krĭng tlaih kbưi găn êlan kbưi amâodah nao hriăm ti čar mkăn. Kyuanăn yơh, tơdah mâo sang hră knŭk kna rông ba mlir gưl hriăm, srăng mgaih msir klei hđeh amâo truh nao sang hră, mđĭ hnơ̆ng jăk bruă sang hră mơar.

 “Hơ̆k mơak êdi. Mĭn tĭng sang hră srăng kdưh kơăm hĭn, mrâo mrang hĭn leh anăn mâo djăp kdrăp yua, lu adŭ hriăm, adŭ mkăn sang hră dôk kƀah. Sơnăn sang hră srăng dưi mkŏ mjing sa bĭt. Bruă anăn đru mđĭ hnơ̆ng jak bruă sang hră mơar.”

Mbĭt hŏng ƀuôn hgŭm Ia Mơ, ară anei, bruă sang čư̆ êa ƀuôn hgŭm Ia Puč, čar Gia Lai ăt ruah wăl lăn 5ha ti ƀuôn Goong, anôk găl hlăm êlan klông, čiăng mprăp anôk ala rŭ mdơ̆ng sang hră knŭk kna rông ba mlir gưl hriăm kơ êbeh 730 čô hđeh sang hră gưl 1 leh anăn gưl. Hdră anei mâo mâo 24 adŭ hriăm, 14 adŭ mtô dŭm mta mbĭt hŏng sang dlăng hră, anôk đru kčĕ klei hriăm hră, sang lu bruă yua, anôk mjuăt ktang asei mlei, anôk dôk, sang dôk kơ phung hđeh leh anăn bruă mkŏ mkra hră mbĭt. Anai Phan Thành Tiến- Khua kiă kriê sang hră gưl 1 leh anăn gưl 1 Phù Đổng, ƀuôn hgŭm Ia Puč brei thâo:

 “Klei bi hmô sang hră knŭk kna mlir gưl hriăm anei jih găl guôp. Hđeh sang hră jing anak čô phunug mă bruă ti dŭm đang pla mjing, êpul mă bruă jing lu êdi. Êngao kơnăn, ênoh phung hđeh sang hră mnuih djuê ƀiă ăt lu, mâo êbeh 67%. Êjai ngă klei bi hmô sang hră knŭk kna rông ba mlir gưl hriăm, srăng mkŏ mjing klei găl kơ phung hđeh mâo klei găl hriăm hră jăk hĭn”.

Hluê si klei tĭng mkă, alŭ wăl knông lăn Yŭ Gia Lai ară anei mâo êbeh 9.400 sang hră. Hlăm anăn 54,65% jing anak čô mnuih djuê ƀiă. Hluê si hdră mtrŭn mơ̆ng Phŭn bruă kđi čar kơ duh bi liê rŭ mdơ̆ng sang hră knŭk kna rông ba mlir gưl hriăm ti 248 ƀuôn hgŭm knông lăn hlăm kluôm ala, mĭn tĭng čar Gia Lai srăng dưi duh bi liê hlăm brô 1.200 êklai prăk ngă hdră ti 7 ƀuôn hgŭm knông lăn.

Mơ̆ng mlan 7/2025, bruă sang čư̆ êa čar Gia Lai gĭt gai leh Knơ̆ng bruă sang hră mơar bi mguôp hŏng bruă sang čư̆ êa alŭ wăl ngă klei ksiêm dlăng boh sĭt, mbĭt anăn dŭm êpul kriê dlăng mjêč ngă hră mơar čiăng mphŭn ngă bruă. Phạm Anh Tuấn, k’iăng khua bruă Đảng čar, khua bruă sang čư̆ êa čar Gia Lai mñă kơ dŭm ƀuôn hgŭm ngă mjêč hră mơar kơ lăn leh anăn sang hră dưi rŭ mjing hnưm.

 “Mñă kơ dŭm anôk bruă, alŭ wăl ngă mtam hră mơar kơ lăn, hră mơar ba jao, tĭng mkăn, čiu tla. Ti anăp jing mă lăn kơ sang hră knŭk kna rông ba, ngă mtam hlăm mlan 9 čoăng kơ mlan 10/2025 anei mâo hră kač rŭ mjing mơ̆ng Phŭn bruă mkŏ mkra čar srăng ngă mtam.

Hŏng klei gĭr anăn, dŭm sang hră kdrăm kơah, mrâo mrang ti krĭng knông lăn dleh dlan mơ̆ng čar Gia Lai dôk ƀrư̆ ƀrư̆ jing klei sĭt, pŏk sa êdei anăp jăk siam hŏng ênuk phung hđeh êlăk.