Tŭ drông klei bi hdơr 93 thŭn hruê mkŏ mjing Đảng leh anăn mđing truh bi hdơr 15 thŭn mkŏ mjing wăl Krah Ƀuôn Hồ, Aguah mbruuê 01/02, bruă sang čư êa wăl krah Ƀuôn Hồ, čar Dak Lak mkŏ mjing knăm kčưm rŭ mjing dŭm hdră mkŏ mkra kñăm, gĭr ktưn mâo dŭm hnơ̆ng čuăn ƀuôn prŏng mta III. Bruă sang čư êa wăl krah Ƀuôn Hồ mkŏ mjing leh knăm kčưm rŭ mjing 4 hdră mkŏ mkra kñăm, kñăm hlăm dŭm mta bruă êlan klông hŏng ênoh duh bi liê hlăm brô 37 êklai prăk, mĭn tĭng bi leh hlăm wưng tlâo mlan tal 2 leh anăn tal 3 thŭn anei.

Dŭm hdră mkŏ mkra anei kñăm bi hơĭt êlan klông, bi djăp ênŭm klei čiăng êrô êbat mơ̆ng mnuih ƀuôn sang. Đặng Gia Duẩn, Khua bruă sang čư êa wăl krah Ƀuôn Hồ brei thâo, bruă mkŏ mjing klei kčưm ngă mơ̆ng akŏ thŭn, wăl krah gĭr ktưn dưn yua tŭ dưn dŭm ai dưi duh bi liê mơ̆ng knŭk kna. Mbĭt anăn, srăng mtrŭt mđĭ klei iêo jak dŭm ênoh prăk duh bi liê, gĭr ktưn mkŏ mjing wăl krah Ƀuôn Hồ jing knơ̆ng anôk bruă duh mkra, dhar kreh, yang ƀuôn ti krĭng Dưr čar Dak Lak, đru mguôp yuôm bhăn hlăm klei đĭ kyar krĭng.