Mbruă, thâo mĭn, kreh kriăng mă bruă knuă, anăn jing hdră ngă bruă mơ̆ng Y Vinh, mnuih djuê ana Mnông ti ƀuôn Sa Pa, să Thuận An, kdriêk Dak Mil, čar Dak Nông dưi mâo klei hdĭp đĭ kyar. Y Vinh yăl dliê, leh hriăm gưl krah dưh bruă mkŏ mkra, ñu amâo lŏ dôk mă bruă mưn ti ƀuôn prŏng ôh, ƀiădah lŏ wĭt kơ ƀuôn sang pla mjing êbeh 1 ha kphê. Tơdah mâo mmông huâng, ñu nao mă bruă ti dŭm anôk bruă mkŏ mkra. Truh kơ yan pĕ kphê, ñu lŏ wĭt kơ bruă pĕ kphê leh anăn mă bruă ti kpur bi mthu kphê kơ gŏ sang. Ayŏng Y Vinh brei thâo:

Kyuadah knŏng pla mjing kphê amâo mâo mnơ̆ng ba wĭt ôh. Msĕ ară anei ênoh hbâo pruê đĭ yuôm, bi kphê thŭn mâo thŭn hơăi. Kyuanăn pô mă lu mta bruă, mă đŭt rông dlông, mă dŭm mta bruă kơ anăp pioh duh bi liê kơ kphê, leh anăn srăng mâo dŭm mta bruă mkăn bi mbŏ mbĭt. Msĕ thŭn mrâo êngao, mâo mă bruă rŭ mdơ̆ng mkŏ mkra nanao, truh kơ knhal jih thŭn amâo lŏ mă ôh, knŏng pĕ kphê đuč. Leh jih bruă pô lŏ nao ngă sang kơ arăng.

Hluê si ayŏng Y Arôn, k’iăng khua bruă hđeh êdam êra să Thuận An, hđeh êdam êra hur har, mbruă êdi hlăm klei mđĭ kyar klei hdĭp mda gŏ sang. Bi lar dŭm klei găl mơ̆ng lăn yua leh anăn krĭng pla mjing kphê hŏng mjeh kphê hruê̆, phung mda asei nao êlâo nanao hlăm bruă dưn yua kdrăp mrâo, hdră mnêč mrâo hlăm klei ngă bruă lŏ hma, mđing truh kơ klei bi hmô msĕ si mkra mjing kphê, mjut mjing êđai kphê mjeh, kphê doh… Phung hđeh êdam êra hur har hlăm dŭm mta bruă yang ƀuôn, kriê pioh knhuah gru djuê ana. Êpul tông čing, kdŏ mmuñ mơ̆ng phung mda asei Thuận An kreh mâo nanao ƀô̆ mta hlăm dŭm klei bi lông, klei rang mdah mơ̆ng čar, mơ̆ng kdriêk. Ayŏng Y Arôn brei thâo:

Djŏ sĭt jing bi lar ai mda asei, diñu jing phung nao êlâo leh anăn mtô kơ mnuih ƀuôn sang dưi thâo dưn yua kdrăp mrâo. Diñu thâo dưn yua klei kreh knhâo, hdră mnêč hlăm klei ngă bruă lŏ hma mơ̆ng gŏ sang, mâo pô pla pluă tiu, kphê, pô ngă đang rah mjeh, pô pŏk anôk đeh kwă kphê…mkŏ mjing bruă mă kơ phung hđeh êdam êra hlăm să. Êngao kơnăn ti diñu ăt hur har hlăm dŭm mta bruă yang ƀuôn, msĕ si bi doh wăl hdĭp mda, pla mnga, pla kyâo ti dŭm bĭt êlan, nao hgŭm hlăm dŭm mta bruă yang ƀuôn hlăm să, hlăm alŭ čiăng hrăm mbĭt mkŏ mkra krĭng ƀuôn sang mrâo.

Să Thuận An mâo 10 alŭ ƀuôn, hŏng êbeh 3.000 gŏ sang, giăm 12.000 čô mnuih, hlăm anăn giăm 1/3 ênoh mnuih ƀuôn sang jing mnuih djuê ƀiă. Hŏng klei hrăm mbĭt mơ̆ng mnuih ƀuôn sang dŭm djuê ana, mơ̆ng thŭn 2018, să dưi tŭ yap bi leh 19 hnơ̆ng čoh čuăn mkŏ mkra krĭng ƀuôn sang mrâo. Anei jing să knông lăn tal êlâo mơ̆ng čar Dak Nông dưi bi leh hdră anei. Trần Khắc Dũng, khua bruă sang čư êa să Thuận An brei thâo, klei găl prŏng hĭn mơ̆ng alŭ wăl jing krĭng pla mjing kphê mâo čar Dak Nông tŭ yap jing krĭng pla mjing dưn yua kdrăp mrâo, mâo mjeh kphê hruê̆ mâo Phŭn bruă lŏ hma leh anăn mđĭ kyar krĭng ƀuôn sang tŭ yap mdê hĭn. Ară anei să dôk hâo hưn đru kơ mnuih ƀuôn sang pŏk phai ênhă pla mjing kphê doh, mkŏ bruă pla mjing kphê đru kơ klei mnia mblei.

Truh kơ jih thŭn 2022, hnư hrui wĭt kah knar grăp čô ti Thuận An mâo 53 êklăk prăk, ênoh gŏ sang ƀun hlăm să knŏng dôk mă 1,35%, klei hdĭp, ai tiê mnuih ƀuôn sang ƀrư̆ hruê ƀrư̆ mlih. Siamdah, hluê si Trần Khắc Dũng, ăt dôk mâo lu klei dleh dlan srăng găn čiăng kơ Thuận An dưi hluê ngă tŭ jing dŭm hnơ̆ng čoh čuăn krĭng ƀuôn sang mrâo mđĭ hnơ̆ng.

Sa alŭ wăl knông lăn mâo 30% ênoh mnuih sang djuê ƀiă, 90% gŏ sang ngă bruă lŏ hma, kyuanăn klei hdĭp mnuih ƀuôn sang ăt dôk mâo lu klei dleh dlan. Leh anăn ară anei hŏng 2 ƀuôn mnuih djuê ƀiă amâo lŏ mâo ôh klei đru mơ̆ng dŭm hdră êlan msĕ hŏng êlâo, ăt ngă truh kơ êdu ai kơ mnuih ƀuôn sang, sitôhmô hră ênua bruă mdrao mgŭn, mđĭ kyar bruă lŏ hma krĭng čư̆ čhiăng…Khădah sơnăn, ƀiădah hluê si hdră mtrŭn mơ̆ng bruă Đảng čar leh anăn hdră êlan mơ̆ng bruă sang čư êa să, ti thŭn 2023, hmei srăng gĭr ktưn dưi truh kơ krĭng ƀuôn sang mrâo mđĭ hnơ̆ng.

Dưn yua jăk dŭm klei găl mơ̆ng lăn ala, yan adiê, hŏng klei hrăm mbĭt, sa ai mơ̆ng mnuih ƀuôn sang dŭm djuê ana, Thuận An dôk duh jih ai mda asei mđing truh kơ să krĭng ƀuôn sang mrâo bi hmô ti krĭng knông lăn čar Dak Nông.