Mă bruă ti sang hră gưl sa Hoàng Diệu, să Čư̆ Nĕ, kdriêk krông Ƀŭk, čar Daklak êbeh 10 thŭn leh nai mtô H’Luê Ƀuôn Krông mâo nanao sang hră đăo knang jao bruă mtô bi hriăm adŭ 1– jing adŭ tal êlâo hlăm gưl. Nai mtô H’Luê lač, êbeh 65% čô hđeh hriăm hră ñu mtô jing mnuih djuê ƀiă sơăi, êngao kơ hdră mtô mâo leh, ñu lŏ čŏng ksiêm hriăm hdră mtô mrâo hlăm internet, mđrĭng hŏng klei ba yua dua boh blŭ klei Yuăn lehanăn klei Ê Đê čiăng kơ phung hđeh ênưih thâo săng.

“Klei dleh dlan hĭn jing mtô kơ phung hđeh čiăng bi thâo kral boh hră, mrô, êjai dôko mtô dah hđeh amâo mâo thâo săng ôh klei Yuăn, kyua mưng blŭ klei amĭ kkiêng, snăn hlăm klei bi blŭ hrăm, snăn mtô phung hđeh tuôm hŏng lu klei dleh dlan. Ƀri mơưh kâo ăt jing anak Ê Đê, hlŏng yua dua boh blŭ hlăm klei mblang kơ phung hđeh, ciăng kơ phung hđeh ênưih thâo săng, lehană hriăm jăk hĭn”.

Mbĭt hŏng klei lŏ dơ̆ng ksiêm duah, ba yua lu hdră mtô bi hriăm mrâo, nai mtô Y - Bih Êban, ti sang hră gưl dua Phan Chu Trinh, să Čư̆ Nĕ, kriêk krông Ƀŭk gĭr jih hnơ̆ng ba yua djăp hdră hlăm klei mtô, ba yua lu mta mnơ̆ng pioh bi hmô, čiăng kơ klei mtô bi hriăm jăk hĭn. Nai mtô Y - Bih brei thâo hlăm grăp mmông mtô, êlâo kơ anăn ñu mprăp leh ƀhĭ klĭ djăp ênŭm  kdrăp mtô bi hriăm, čiăng kơ klei mtô ba kơ hđeh ênưih thâo săng, bi mguôp klei hriăm êjai, hlăp êjai, mâo klei mđăo mơak, êmuh pral wĭt lač pral čiăng kơ mmông hriăm mtluk mtlak mơak mñai. Mơ̆ng anăn mtrŭt phung hđeh khăp kơ klei hriăm hĭn, lehanăn ênưih thâo săng mơh:

“Sang hră mâo mprăp leh kdrăp mrâo mrang, mâo tivi, mâo masin mdah rup čiăng kơ phung hđeh ktue dlăng tinăn, hŏng rup bi hmô klă mngač čiăng bi ênưih thâo săng klei hriăm”.

Hŏng hdră mtô mrâo snăn, grăp mmoong hriăm ngă kơ phung hđeh hriăm hŏng klei amâo mâo ê’am alah ôh, tơl hnơ̆ng diñu dôk guôn čiăng hriăm. Adei H’Nani Mlô, adŭ 9C, sang hră gưl 2 Phan Chu Trinh, să Čư̆ Nĕ, kdriêk Krông Ƀŭk lač; grăp mmông nao mtô amâo mâo lŏ lĕ hlăm klei ê’am alah ôh, lehanăn ƀuh phung hđeh thâo săng pral, jing leh klei mđĭ ai:

 “Phung nai mtô bŏ hŏng klei hur har, mâo klei thâo hĭn, ênưih thâo săng. Asei kâo pô gĭr hriăm mjuăt čiăng truh ti mmôn gbi lông jih gưl srăng mâo boh tŭ dưn prŏng, lehanăn dưi nao mŭt adŭ 10”.

Čar daklak ară anei, mâo leh giăm mkrah êklăk čô hđeh hriăm hră mơ̆ng gưl hđeh điêt hŏng truh kơ gưl 2. Bi mklă bruă sang hră mơar jing sa hlăm dŭm mta kñăm yuôm bhăn čiăng bi leh ênoh čuăn mkŏ mkra krĭng ƀuôn sang mrâo, wưng leh êgao, čar mâo leh lu hdră, kñăm mđĭ hnơ̆ng jăk hĭn hlăm klei mtô bi hriăm, čiăng kơ sang hră mơar jing anôk mjuăt bi hriăm jăk tŭ jing.

Tui si Nguyễn Tường Hiệp, k’iăng khua knơ̆ng bruă sang hră mơar čar Daklak, 70% boh sang hră mơar mơ̆ng gưl hđeh điêt hlŏng truh kơ gưl 2 hlăm čar mâo rŭ mdơ̆ng mkra mjing leh hŏng klei kjăp siam, mâo mprăp djăp ênŭm kdrăp mtô bi hriăm. Dŭm boh sang hră hlue ngă jăk dŭm ênoh čuăn mrô 14 kơ klei mjuăt bi hriăm, rơ̆ng bruă bi hriăm jih gưl 2 hŏng hnơ̆ng ênoh hđeh hriăm hră dưi jih gưl truh 70% kơ dlông. Čiăng mđĭ hĭn hnơ̆ng kjăp klei mtô bi hriăm hlăm dŭm alŭ wăl krĭng taih kbưi, boh nik krĭng mnuih djuê ƀiă Nguyễn Tường Hiệp lač, čiăng kơ phung nai mtô mâo klei thâo, mtô jăk snăn lŏ mđing kơ bruă mjuăt bi hriăm phung nai mtô:

 “brei mđĭ nanao hnơ̆ng thâo hlăm klei mtô, bvôh nik phung mtô jing mnuih djuê ƀiă, dưi mâo klei thâo hĭn, pioh mtô hđeh hŏng klei tŭ dưn. Mđĭ bruă bi mlih mrô, ba yua kdrăp mrâo hlăm klei mtô bi hriăm ti sang hră. Lŏ ksiêm wĭt jih jang hdră êlan mtô bi hriăm, bi tui tiŏ hdră êlan mtô bi hriăm hlăm hdră mrâo mrang”.

Hlăm ênoh čuăn mơ̆ng ala čar, kơ bruă mkŏ mkra krĭng ƀuôn sang mrâo mâo 2 ênoh čuăn djŏ tuôm hŏng bruă mjuăt bi hriăm, mâo leh čar mđing dôk ngă truh 83% lehanăn 98%. Mbĭt hŏng dŭm klei gĭr mơ̆ng bruă sang čư̆ êa, dŭm dhar bruă djŏ tuôm, phung nai mtô ti Daklak, boh nik hlăm dŭm alŭ wăl dleh dlan ăt hur har hŏng sang hră, ngă jăk bruă mjuăt mjing anak mnuih, bi mâo mnuih thâo săng, thâo mĭn pioh rŭ mdơ̆ng lăn čar mgi dih./.