VOV4.Jarai-Hăng anŏ gêh gal ayuh hyiăng klă, lŏn mơnai glai klô rơgoh laih anun mơnuih mă bruă hơmâo djop, hơdôm thun giăm anai, Lâm Đồng gleng nao kơ bruă pla phun boh troh, amăng anun 70% đơ đam đang boh troh, gơnam boh troh hơmâo ƀơi tơring čar dưi tŭ yap jing boh troh hiam, rơgoh. Ră anai, Lâm Đồng hơmâo giăm 24.500 ha đang boh troh, abih bang pơhrui glăi 183 rơbâo tơn.

Mơneč mă tơlơi gêh gal anun thun anai, Lâm Đồng gleng nao dơ̆ng pơđĭ kyar pla pơjeh boh troh jơman hloh, hiam klă pioh pla nao plah wah amăng đang kyâo pơkŏn kah hăng amăng đang če, đang phun kyâo sui thun, đang kơphê.

Mơ̆ng anun, kơtưn kiăng ngă djơ̆ tơhnal pơtrun đơ đam pla boh troh ƀơi Lâm Đồng đĭ truh 26 rơbâo ha, boh troh pơhrui glăi kiăng hơmâo 185 rơbâo tơn rơnuč thun anai, amăng anun đing nao pơđĭ kyar pla boh ƀơr hăng boh sầu riêng.

Nay Jek: Pơblang